NORTH COTABATO- NASAWI ang isang public school teacher at mister nito matapos araruhin ng rumaragasang pick-up truck ang sinasakyan nilang motorsiklo sa Cotabato-Davao Highway sa Barangay Pagangan, Aleosan sa lalawigang ito.
Sa report na nakarating sa Camp Crame, sinabi ni Cotabato Police Provincial Director Colonel Harold Ramos na dead on the spot ang mga biktimang sina George Gornes at Remedios Gornes.
Nabatid na binabaybay ng mag-asawa ang highway nang mahagip ng kulay puting Hilux pick-up na nawalan umano ng kontrol dahil sa madulas na kalsada nang subukang umover-take sa isa pang sasakyan.
Bukod sa mag-asawa, nadamay din ang isa pang nakaparadang motorsiklo sa tabi ng kalsada.
Boluntaryo namang sumuko sa mga awtoridad ang driver ng pick-up na nakatakdang sampahan ng kaukulang reklamo. REA SARMIENTO