MAGAAN NA PAYMENT SA LOAN NG TEACHERS

MALAKING tulong sa mga miyembro ng Government Service Insurance System (GSIS) na nag-avail  ng loan ang inilunsad na Program for Restructuring and Repayment of Debts (PRRD).

Partikular na mabebenipisyuhan nito ang mga guro na may mga nakabinbing pagkakautang lalo na ang mga malapit nang magretiro.

Ayon kay  GSIS President and General Manager Jesus Clint Aranas, sa nasabing programa ay ire-restructure ang mga delingkuwenteng utang ng mga miyembro sa pamamagitan ng pag-aalis ng penalties o surcharges.

Gayunpaman, nilinaw ni Aranas na hindi kasama rito ang interest na siyang nakapaloob sa sandaling nag-avail ng loan ang isang miyembro.

Sinimulan noong nakaraang Disyembre ng nakaraang taon ang nasabing programa  at  umaabot sa 672,425 ang kuwalipikadong inactive members at nasa 986 ang nag-avail nito.

Gayundin, umabot sa 106 ang bilang ng na-restructure na loan at umabot na sa halagang P4.1 mil­yon ang naayos.

Nitong Enero 25 ay  41 na inactive members ang tuluyan nang nakaba­yad sa kanilang pagkakautang at may 29 naman ang patuloy na nagbabayad sa pamamagitan ng installment basis.

Bukod dito, inilabas na rin ang P12.95 bilyong  GSIS Financial Assistance Loan (GFAL) sa may 36,692  personnel ng Department of Education (DepEd) na nagsimula noong May 2018.

“The combined nationwide figures posted in GFAL’s first six months of implementation signify positive acceptance by our members in DepEd. We continue to encourage qualified DepEd employees to avail of GFAL to ease their burden in paying their loans,”giit ni Aranas.

Ang GFAL ay isang debt-consolidation at balance-transfer facility na naglalayong tulungan ang  DepEd workers na maayos nila ang kanilang outstanding loan balance sa accredited private lending institutions (PLIs).

Nabatid pa na mahigit sa kalahati ng kabuuang miyembro ng GSIS ay mga kawani ng DepEd.  VICKY CERVALES