CAVITE – SWAK sa kulungan ang magkapatid na shoplifter makaraang arestuhin sa aktong shoplifting sa loob ng kilalang shopping mall sa bahagi ng Barangay Sampaloc 1, Dasmariñas City, Cavite kamakalawa ng gabi.
Pormal na kinasuhan ng pulisya ang mga suspek na sina Annie Claire Palaganas y Carreon, 31; at Larnie Palaganas y Carreon, 38, kapwa nakatira sa Block 80, Lot 43 Bella Vista, Barangay Santiago, General Trias City, Cavite.
Base sa ulat ni PO2 Dexter Anadilla na naisumite sa Camp Pantaleon Garcia, lumilitaw na nag-shopping ang magkapatid sa SM City Dasmariñas Department Store kung saan magkasabwat na sumikwat ng ilang damit at sapatos na pambata.
Ayon pa sa police report, dumiretso ang mga suspek palabas bitbit ang mga nanakaw na itinago sa kani-kanilang bag at hindi na dumaan sa kahera.
Gayunman, hindi nakaligtas sa matalas na mga mata ng dalawang guwardiya na sina Romeo Archivido at Jesse Villegas ang mga suspek kaya inaresto at kinapkapan.
Wala namang maipakitang resibo ang mga suspek sa kanilang bitbit na gamit na nagkakahalaga ng P 2, 719. 25 kaya dinala sila sa himpilan ng pulisya para sa kaukulang pagsasampa ng kasong kriminal. MHAR BASCO
Comments are closed.