MAIBSAN SANA ANG PANGAMBA NG MGA NASA INDUSTRIYA NG BAKAL

TILA hindi naging maganda ang pagpasok ng bagong taon para sa industriya ng bakal. Bago magtapos ang taon ay naglabas ng bagong utos ang Department of Trade and Industry – Bureau of Philippine Standards (DTI-BPS). Ang bagong kautusang ito ay tinawag na Department Administrative Order (DAO) No. 20-10, series of 2020. Ito ay inilabas noong ika-28 ng Disyembre 2020.

Sa ilalim ng nasabing kautusan ay ginawang mandato ng DTI-BPS para sa mga negosyong nagbebenta at nag-aangkat ng materyales na ginagamit sa pagbububong ang pagkuha ng Philippine Standard (PS) Safety Certification Mark License para sa mga produkto nito. Kung hindi ito makukuha, hindi mabibigyan ng pahintulot ang pagbebenta ng nasabing mga materyales sa ating bansa. Ang mga nag-aangkat ng naturang mga produkto ay mapipilitang kumuha ng mga produkto mula sa mga supplier na may PS license.

Sa paliwanag naman ni DTI Secretary Ramon Lopez, layunin ng DAO 20-10 ang masiguro na maayos ang kalidad ng mga produktong bakal bago ito iangkat, ipagbili, at gamitin sa loob ng bansa.

Ayon sa Philippine Information Agency, ang mga produktong hot-dip metallic-coated steel coil and sheet at pre-painted galvanized steel coil and sheet na ginagamit sa pagbububong at iba pang kagamitan ang naapektuhan ng DAO 20-10. Ang ibang mga produktong bakal na hindi nabanggit ay nangangailangan namang kumuha ng Ceritificate of Exemption mula sa DTI-BPS.

Ang PS Quality and/or Safety Certification Mark License ay ibinibigay sa mga lokal o internasyonal na pagawaan na ang pabrika at produkto ay sumunod sa ispesipikasyong kinakailangan ng Philippine National Standard (PNS) ISO 9001 at iba pang naaangkop na pamantayan para sa mga produkto.

Naniniwala si Secretary Lopez na sa pamamagitan ng bagong teknikal na regulasyon ay mas mapagaganda ang kalidad ng mga produkto ng industriya ng bakal – gawa man dito sa atin o inangkat mula sa ibang bansa. Kasama rin sa isinaalang-alang sa pagpapatupad ng DAO 20-10 ang kaligtasan ng mga mamamayan lalo na’t ang Filipinas ay dinadaanan ng 20 hanggang 25 na bagyo kada taon.

Bagaman maganda ang intensiyon ng DAO 20-10, umalma naman ang mga miyembro ng industriya ng bakal na naapektuhan ng nasabing kautusan. Nangamba ang mga ito ukol sa maaaring maging epekto ng ipinatupad na DAO sa kalagayan ng supply at sa presyo ng kanilang mga produkto.

Maaaring magresulta sa kakulangan sa supply ang agarang pagpapatupad ng DAO 20-10. Ang mga ito ay kailangan upang makumpleto ang mga proyektong pagpapabahay ng pamahalaan at iba pang mga proyektong imprastraktura nito. Sa madaling salita, kapag naaapektuhan ang supply ay maaari ring maantala ang progreso ng mga proyekto. Ang kakulangan sa supply ng anumang produkto ay nagkakaroon din ng epekto sa presyo. Kapag kulang ang supply, tumataas ang presyo ng produkto at serbisyo.

Dagdag pa sa pangamba ng mga negosyanteng apektado ng nasabing DAO ay ang mga produktong kanilang inangkat na nakatakdang dumating sa bansa hanggang Abril 2021 ay hindi papasa sa itinakdang minimum na kapal na 0.4mm na nakasaad sa DAO 20-10, Series of 2020. Ito ay dahil sa ang kanilang ginagamit bilang pamantayan ay ang PNS 67:2014.

Tiyak na malaki ang mawawalang kita sa mga negosyanteng apektado ng agarang pagpapatupad ng DAO 20-10. Karamihan kasi sa mga ito ay nakabili na ng mga produkto bago pa man inilabas at ipinatupad ang DAO 20-10, Series of 2020.

Nagulat ang mga miyembro ng industriya ng bakal sa paglabas ng DAO 20-10 dahil tila taliwas ito sa layunin ng Republic Act No. 11032 o ang Ease of Doing Business and Efficient Government Service Delivery Act, na siyang isinabatas ng Pangulo, dalawang taon na ang nakararaan. Ang batas na ito ay naglalayong padaliin at mas paghusayin ang proseso para sa mga nagnanais magnegosyo.

Sa ilalim ng DAO, aabot sa 24 ang bilang ng dokumentong kailangang isumite ng mga negosyanteng gumagawa ng bakal bago makakuha ng pahintulot na mailabas ang kanilang mga inangkat na produkto.

Kaugnay ng RA 11032 ay isinabatas din ang RA 11571. Layon ng nasabing batas ang mabilis na pagbibigay ng permit, mga lisensiya, at mga sertipikasyon sa mga panahon ng emerhensiya gaya ng pandemyang COVID-19.

Sa pamamagitan ng naturang batas ay may kapangyarihan ang Pangulo, sa panahon ng emerhensiya, na pabilisin ang proseso, pansamantalang suspendihin o tanggalin ang mga requirement para sa mga permit, mga lisensiya, sertipikasyon, at mga awtorisasyon.

Malaking tulong ang nasabing batas sa mga negosyo, maliit man o malaki. Malaking bagay rin ito sa muling pagbangon ng ating ekonomiya. Kung ang batas na ito ay maipatutupad kasabay ng pag-uumpisa ng pagdating ng bakuna sa bansa at ng muling pagbubukas ng ating lokal na turismo, nakikita ko na ang magiging magandang epekto ng mga ito sa ekonomiya.

Bagaman ang DAO 20-10 ay naglalayong masiguro ang kalidad ng mga materyales na bakal na inaangkat at ginagawa sa bansa, marahil dapat ding balansehin ng pamahalaan ang usaping ito. Ngayong panahon ng pandemya, napakahalaga na matulungan ang mga negosyo na makabangon mula sa malubhang epekto ng pandemyang COVID-19 sa bansa. Ang agarang pagpapatupad ng nasabing DAO 20-10 ay magreresulta sa pagkalugi ng mga miyembro ng industriya ng bakal.

Kailangan itong balansehin ng pamahalaan dahil malaki rin ang papel na ginagampanan ng industriya ng bakal sa proyekto ng administrasyon ni Pangulong Duterte na ‘Build Build Build’.

Palagiang sumusunod sa mga pamantayang itinatakda ng pamahalaan ang industriya ng bakal, ngunit sila ay naniniwala na ang bagong DAO ay maaaring magsanhi ng pagkaantala ng mga importanteng proyektong imprastraktura ng pamahalaan. Maaari rin itong magsanhi ng kakulangan sa mga kabahayan pagdating ng taong 2030.

Napakahalaga na nagkakasundo sa diskarte ang iba’t ibang sangay ng pamahalaan. Ang pamahalaan ay masigasig sa paggawa ng mga hakbang patungo sa muling pagbangon ng ating ekonomiya. Mahalaga rin sa ating muling pagbangon ang mabigyan ng kinakailangang pagsuporta ang iba’t ibang industriya ng bansa lalo na ang mga maliliit na negosyo na lubhang naapektuhan ng pandemyang COVID-19.