MALABON CITY – NASUGATAN ang isang pedicab driver matapos saksakin sa puwit ng helper makaraan ang mainitang pagtatalo kahapon ng madaling araw sa lungsod na ito.
Ginagamot sa Tondo Medical Center sanhi ng tinamong saksak sa puwit si Alfredo Lozano Jr., 47, ng 12 Gulayan Sto. Niño St., Brgy. Concepcion.
Nahaharap naman sa kaukulang kaso ang suspek na si Wiliam Espiritu, 27 ng Katarungan St., Brgy. Muzon matapos maaresto ng rumespondeng mga tauhan ng Police Community Precinct (PCP) 7.
Sa imbestigasyon nina PSSg Julius Mabasa at PSSg Jose Romeo Germinal II, alas-12:20 ng madaling araw nang magkaroon ng pagtatalo ang biktima at ang suspek sa harap ng Elmer’s Tapsilogan sa Gov. Pascual, Brgy. Concepcion.
Sa kainitan ng pagtatalo, bumunot ng patalim ang suspek at inundayan ng saksak sa puwit ang biktima na mabilis isinugod sa naturang pagamutan. EVELYN GARCIA
Comments are closed.