QUEZON-NAGBIGAY sigla at saya sa mga taga-Quezon ang isinagawang programa sa pagbubukas ng Christmas Light Decors sa may Perez Park bahagi ng Provincial Capitol Compound nitong Martes ng Gabi.
Bago ang switch on ng mga christmas light ay nagsagawa muna ng banal na misa na pinangunahan ni Bishop Uy kasama ang mag asawang Governor Danilo Suarez,Congresswoman Aleta Suarez ng ikatlong Distrito ilang Board Members at Mayors na kung saan ang umawit sa misa ay ang mga seminarista mula sa St.Alfonsus Regional Seminary at Choir ng Quezon Science High School.
Matapos ang maikling mensahe ng gobernador, sabay sabay na nagbilang para sa pagbubukas ng mga christmas light na sinabayan ng mga naggagandahang fireworks.
Namangha ang lahat sa pag-ilaw ng higanteng christmas tree at gardens na pinuno ng makukulay na christmas lights na noong nakaraang holiday season ay hindi nakita at nasaksihan dahilan sa kasagsagan ng pandemya noong nakaraang taon.
Sa kasalukuyan, patuloy na pinapasyalan nang paulit ulit ng mga tao ang naturang parke tuwing sumasapit ang gabi at maging ang mga karatig lugar at ibang bayan sa lalawigan ng Quezon ay dinarayo ang kagandahan ng pamaskong pailaw ng probinsiya. BONG RIVERA