MANUEL SA GINEBRA?

MAGIGING panauhin sa 44th week ng ‘Usapang Sports’ ng Tabloids Organization in Philippines Sports  (TOPS) ang BRT Sumisip Basilan-St. Clare sa Huwebes, Oktubre 17, kung saan ang kampo ni coach Jerson Cabiltes ang nag-champion sa katatapos na PBA D-League Foundation Cup. Ang session ay ginagawa sa National Press Club sa alas-10 ng umaga.

Makakasama ng BRT Sumisip-St. Clare team sina Philippine National Anti – Doping Organization (PHINADO) president Dr. Alejandro Pineda at Wu Lin Feng Global Fighting Championship-Philippines promoter Maynard S.Marina, Aaron Catunao ng Fight Night Productions at local kickboxing champions Mark Alcoba at Dindo Camansa.

Tatalakayin ni Dr. Pineda sa naturang session ang anti-doping activities ng government sa pakikipagtulungan ng Philippines Sports Commission (PSC) at iba pang ahensiya ng pamahalaan.

Magbibigay naman ng detalye sina Marina at Catunao sa kauna-unahang professional kickboxing competition sa bansa na gaganapin sa October 23 sa Cove ng Okada Manila. Ipaaalam nina Alcoba at Camansa ang kanilang tsansa laban sa Chinese opponents sa blockbuster promotion na may basbas ng Games and Amusement Board (GAB).

vvv

Sa unang pagkakataon ay nanalo ang Alaska laban sa Rain or Shine noong  Linggo. May 1-5 record ang Aces at parang nag-champion ang tropa ni coach Jeffrey Cariaso pagkatapos ng panalo. Umaasa ang Aces na magtutuloy-tuloy na  ang kanilang panalo.

Pero gaano kaya katotoo ang usap-usapan sa apat na sulok ng  Big Dome na mati-trade si Vic Manuel sa Ginebra kapalit nina Jarred Dilinger at Jeff Chan? Malamang ay ‘di lang si Manuel laban sa dalawa ng Gin Kings. Abangan na lang natin.

vvv

Interesado ang  Phoenix  sa kalibre ni Joe Devance ng Ginebra. Si Devance ay kasalukuyang nasa coaching staff ng Gin Kings. Nasa unrestricted ang player, free agent na ito. Dati nang naging player ni coach Louie Alas si Devance noong nasa amateur pa ito. Pero tsika namin na ibabalik agad ng Ginebra management ang player sa line-up. Saka si Joe ay isinama ni coach Tim Cone sa coaching staff ng Gilas team. Last Sunday ay nakita nga namin na naka-long sleeve at naka-necktie si Devance sa bench ng Ginebra.

vvv

Congrats sa BRT Sumisip- St. Clare na nag-champion sa katatapos na PBA D- League laban sa Marinerong Pilipino. Marami ang ‘di makapaniwala na ang Sumisip ang nag-champion dahil mas malakas ang Marinero sa kanila. Ano ang nangyari, coach Yong Garcia?