DAHIL madalas na tila hindi napapansin ang mga sakit sa pangkaisipan, na marami ang hindi nakakaalam sa mga palatandaan at sintomas, inihain ni Senador Christopher “Bong” Go ang Senate Bill No. 1786, na naglalayong mag-atas sa mga public higher education institutions (HEIs) na palakasin ang kanilang mental health services at magtatag ng Mental Health Offices sa kani-kanilang mga kampus.
“One’s mental health has always been my priority, especially when the COVID-19 hit the country. Palagi itong iniiwasan na pag-usapan dahil kadalasan nahihiya sila sa posibilidad na ma-discriminate sila ng tao. But mental health is an important part of your well-being kaya dapat huwag natin ito pabayaan,” pahayag ni Go, chairman ng Senate Committee on Health and Demography.
Ayon sa mga pag-aaral, ang mga naiulat na rate ng pagpapakamatay sa bansa ay tumaas sa nakalipas na ilang dekada, partikular sa mga kabataan.
“Kaya hindi po dapat natin ito palagpasin. Mental health is very important to address just like any other health concern,” patuloy ni Go.
Dahil dito, ang SBN 1786 na inihain ni Go noong Enero 26, ay naglalayon na palakasin ang mga serbisyo sa kalusugan ng isip ng mga pampublikong institusyong pang-edukasyon sa pamamagitan ng pagtatatag ng Mental Health Office sa lahat ng kani-kanilang mga kampus.
Ang Mental Health Office ay magtatayo ng mga hotline sa kampus na may dedikado at sinanay na mga tagapayo upang magbigay ng tulong sa buong komunidad ng HEI, lalo na ang mga mag-aaral. Nakasaad din sa panukalang batas na dapat bigyan ng espesyal na atensyon ang mga natukoy na may problema o kondisyon sa kalusugan ng isip, lalo na ang mga nasa panganib na magpakamatay.
Ang Commission on Higher Education at public HEIs, sa pamamagitan ng Mental Health Offices, ay magpapasimula at magsusustento ng mas mataas na kampanya upang itaas ang kolektibong kamalayan tungkol sa kalusugan ng isip.
“Alam n’yo, umpisa pa lang ng pandemya, marami na pong naiulat na nakaka-experience ng depression… Marami rin nawalan ng kabuhayan,” recounted Go.
“Umpisa pa lang ng krisis, talagang maraming apektado to the point na tumataas rin ang depression and worse, suicide cases. We have to address this issue,” pagdudiin ni Go..
Ayon sa isang pag-aaral na isinagawa ng University of the Philippines Population Institute, 7.5% ng mga kabataang Pilipino ay nagtangkang magpakamatay noong 2021.
Bilang karagdagan, iniulat din ng pag-aaral na, sa pagitan ng 2013 at 2021, ang “suicide ideation” sa mga kabataang Pilipino ay higit sa doble. Ang ideyang magpakamatay ay isang terminong ginamit ng World Health Organization upang ilarawan ang “mga kaisipan, kagustuhan, abala, at pagmumuni-muni tungkol sa kamatayan at pagpapakamatay.”
“Hindi po ako titigil sa pagsasagawa at pagsuporta sa mga programa para makatulong sa ating mga kabataan at mga kababayan na may mental health disorders. Hindi po biro ito. Magtulung-tulong tayo para mabigyan ng sapat na suporta at pondo ang ating mga mental health programs,” dagdag ni Go.
Samantala, binigyang-diin ng senador na nauna nang nilagdaan ni dating pangulong Rodrigo Duterte ang Republic Act 11036 o ang Philippine Mental Health Act, na nagtatatag ng national mental health policy na nakadirekta sa pagpapabuti ng kalusugan ng populasyon.
