ILANG artista ang humarap sa dambana nitong taong 2018.
Noong Marso, naging legal na ang pagsasama nina Henyo Master Joey de Leon at Eileen Macapagal matapos ang 35 taon nang kanilang pagiging mag-partner in life.
Sa isang ulat, bukod sa isang church wedding, mayroon pa rin silang civil wedding.
Buwan naman ng Mayo nang ikasal sa Hong Kong ang isa pang Kapuso artist na si Rich Asuncion at nobyo niyang si Benjamin Mudie, isang Fil-Am rugby player.
Dinaluhan ang kasal ng mga malalapit na kaibigan sa loob at labas ng showbiz industry.
Naging intimate din ang kasal ng Asia’s Romantic Balladeer na si Christian Bautista at Kat Ramnani sa Bali, Indonesia noong Nobyembre.
Sinundan ito ng isang enggrandeng wedding reception sa Maynila noong Disyembre.
“When Kat was walking down the aisle and all our dreams were coming through that moment, it was a perfect day, we had a lovely time with the friends and family. Everything just worked, so I’m so happy na talagang, it was one of the best days of our lives,” ani Christian.
Ginulat naman nina Kylie Padilla at Aljur Abrenica ang lahat sa kanilang pagpapakasal nitong Disyembre 11.
Pero bago nito, kumalat na sa social media ang mga larawan ni Kylie na nakasuot ng wedding gown.
Dark, dramatic look ang tema ng kanilang kasal na may color motiff na red at black.
“Walang masyadong nagbago kasi matagal na ding kaming “kami.” So ‘yun lang, ‘yun lang hanggang sa matapos, alagaan lang,” sabi ni Kylie.
Hindi nagpahuli ang aktres na si Lotlot de Leon na ikinasal sa Lebanese businessman na si Fadi El Soury nitong Disyembre 17 matapos ang anim na taon nilang relasyon.
Present din sa kasalan ang apat na anak ni Lotlot at ama niyang si Christopher de Leon.
Halos magkasunod sila ng kasal ni Iza Calzado sa kanyang foreigner boyfriend na si Ben Wintle sa isang beach wedding ceremony.
Ngayong taon din ikinasal ang Kapuso journalist na si Kara David at partner niyang si LM Cancio, sina Rachelle Ann Go at Martine Spies, Coleen Garcia at Billy Crawford, Jade Lopez at Rocky Siccion, Archie Alemania at Gee Canlas, at Jaycee Parker at Jericho Aguas.
