MGA NAGBABALAK MAG-US APEKTADO SA OFW BAN

AGAD  na pinawi ng  Department of Foreign Affairs (DFA) ang alalahanin ng mga Filipino workers sa Amerika na  maaapektuhan sa inilabas na ban sa pagkakaloob ng H-2A at H-2B visa sa mga banyaga.

Nilinaw ng DFA na hindi apektado ang Filipino community sa Amerika at hindi naman babawiin sa kanila ang hawak na H-2A o H-2B visa.

Saklaw lamang ng ban ang mga Filipino  na nagbabalak pumasok sa Amerika  sa trabahong may kaugnayan sa agrikultura at hindi ang mga Pi-noy na nabigyan na ng kahalintulad na visa bago pa ipinalabas ang ban.

Nagpaalala  sa mga Pinoy sa US ang  Philippine Embassy sa Washington  at ng iba pang Philippine Consulates General na sumunod nang maayos sa batas ng naturang bansa lalo na sa immigration laws.

Naglabas  ang US Department of Homeland Security (DHS) nitong Enero 18  ng ban  sa pagpasok ng karagdagang manggagawang Pinoy na may hawak na H2-A and H2-B visa dahil sa isyu ng “severe” overstaying and human trafficking.

Inirereklamo ang mataas na bilang ng  mga kaganapang  sangkot ang mga Filipino sa overstaying.

Ang H-2A at H-2B visas ay nagbibigay ng pahintulot sa mga Amerikano na magpasok sa US ng foreign workers upang punuan ang pangangailangan nila sa mga manggagawang pang-agrikultura at hindi agrikutural. AIMEE ANOC