CAVITE- NILOOBAN ng tatlong armadong lalaki ang dalawang kilalang medical clinic kung saan iginapos pa ang labindalawang kliyente nito sa Silang sa lalawigang ito.
Sa pahayag ng pulisya, magkakasabay na dumating ang tatlong suspek sakay ng isang Revo at isang gold Adventure na nagkunwaring pasyente ng Puremed Inc dakong alas -4 ng hapon na umabot ng alas-10:30 ng gabi.
Pagkapasok sa pinto ay agad na nagpahayag ng holdap Ang mga suspek kung saan unang iginapos ang isang Dra. De Leon at isinunod naman ang iba pa.
Tinutukan ng baril ng mga suspek ang mga biktima habang isa-isang nilimas ang mga dalang cellphones, laptop, relos, alahas at mga personal na gamit ng mga ito.
Matapos ang panloloob sa Puremed clinic , agad na isinunod ng tatlong suspek ang katabing Magnifident Inc. at mabilis din iginapos ang mga pasyente nito at dali-dali rin nikuha ng mga gamit ang mga ito.
Ayon pa sa mga imbestigador, bago tuluyang umalis ang mga armadong lalaki ay pinutol ng mga ito ang linya ng telepono , koneksyon sa cctv at dinala pa ang hard drive nito.
Kinilala ng pulisya ang mga iginapos na sina Paul Igloso, Ralph at Thalia Marie Gevana, Lolita Casis, Jocelyn Casis, Jocelyn Delmo, Janel Donjo, Emmanuel Digo at isang Hazel Joy.
Inaalam pa ng mga imbestigador ang pagkakakilanlan ng tatlong armadong lalaki. ARMAN CAMBE