(Mga residente ng exclusive subdivision umaangal) POGO WORKERS SOBRANG DAMI

UMAANGAL na ang mga residente sa isang  exclusive na subdivision sa Parañaque dahil sa biglang pagdami  ng  mga manggagawa ng Philippine Offshore Gaming Operators (POGOs).

Sa pagpapatuloy ng pagdinig ng Senate Blue ribbon committee  sa umano’y money laundering at iba pang krimen na may kaugnayan sa paglaganap ng POGO sa bansa, ipinakita ng chairman ng komite na si Senador Richard Gordon ang vi­deo ng interview sa isang residente ng subdivision  na nakararanas ng pagbaba sa kalidad ng kanilang pamumuhay.

Sa salaysay ni Pia Gray, matapos payagan na mag-operate ang POGO ay biglang tumaas ang populasyon sa kanilang komunidad dahil sa paglobo sa bilang ng Chinese workers doon.

Dahil dito ay  tumaas ang consumption sa resources at pasilidad ng kanilang komunidad  tulad ng koryente, tubig at sa basura.

Gayundin, mayroong residential spaces sa kanilang lugar na para lamang sa isang pamilya subalit okupado ito ng hindi bababa sa 40 Chinese nationals habang sa ibang single house naman ay may 200 o mahigit 100 ang nakatira.

Inireklamo rin ni Gray ang epekto sa kanilang komunidad ng pagdami ng sasakyan na  sumusundo sa mga mang­gagawa.

Nakararanas na rin umano ang mga residente na pumuputok ang mga kable ng koryente dahil sa dami ng load, habang ang shuttle na sumusundo sa  POGO workers ay umaabot na umano sa 500 na nagdudulot ng traffic at ang carbo footprint na tumaas na rin.

Bukod dito, naranasan na rin umano nila ang pagkakaroon ng  raid sa village kung saan ma­raming naka-witness nito habang isang araw dakong  alas- 3 ng mada­ling araw ay may nakita silang tumalon mula sa third  floor ng bahay na  mga  nakahubad na lalaki at babae. VICKY CERVALES