MGA RESIDENTE SA PALIGID NG TAAL INALERTO

NANAWAGAN ang Malakanyang sa mga residente malapit sa Taal Volcano sa Batangas na maging alertado at sumunod sa awtoridad sakaling ipag-utos ang paglikas.

Sinabi ni Presidential Spokesman Harry Roque na puspusan ang pagtutok ng pamahalaan sa sitwasyon sa Taal Volcano na ngayon ay nasa Alert Level 3 dahil sa patuloy na pagbuga ng asupre.

“We ask residents in the areas surrounding the volcano lake to remain vigilant, take precautionary measures, cooperate with their local authorities should the need for evacuation arise,” ayon kay Roque .

Kailangan ang paglikas sa mga barangay sa bayan ng Laurel at Agoncillio gayundin sa iba pang bayan na malapit sa nasabing lalawigan na itinuturing na high risk.

Ang mga local government unit ang nangunguna sa pamamagitan ng Disaster Risk Reduction and Management Offices kaagapay ang counterpart agencies sa pagbibigay ng gabay sa paglikas ng mga residente sa mga apektadong lugar.

Dagdag pa ni Roque na ang Department of Social Welfare and Development Region 4-A ay nasa heightened alert na rin at tiniyak ang stockpiles ng relief support na kinabibilangan ng food packs na nagkakahalaga sa P1.4 million at non-food items na may halagang P11 million.

Inaktibo na rin aniya ng Armed Forces of the Philippines-Southern Luzon Command ang Joint Task Force Taal para umagapay sa operasyon ng Regional Disaster Risk Reduction and Management Council at ng local government units.

Nakataas na rin ang alerto ng Philippine National Police -Calabarzon at may koordinasyon sa LGU para umagapay sa mga residente roon.

Nag-deploy na rin ng mga sasakyang pantubig ang
Philippine Coast Guard Logistics Systems Command para sa humanitarian assistance and disaster relief operations.

Ayon sa Philippine Institute of Volcanology and Seismology ( Philvocs), nagkaroon ng maikling phreatomagmatic eruption sa main crater ng Taal kung saan bumuga ito ng dark gray na usok na umabot sa halos 1000 meters ang taas dakong alas 3:16 ng hapon nitong Huwebes. EVELYN QUIROZ