BULACAN-WALONG sugarol ang natimbog makaraang minalas na mahuli sa aktong nagsusugal ng Lucky 9 at Tong-its sa isinagawang anti-illegal gambling operation sa Barangay Malhacan, Meycauayan City at Barangay Caniogan, Malolos City kamakalawa.
Base sa report na isinumite kay Col.Rommel J.Ochave, Acting Provincial Director ng Bulacan PNP, nakakulong ngayon ang walong sugarol na nahaharap sa kasong illegal gambling o PD 1602 sa piskalya ng siyudad ng Meycauayan at Malolos.
Nabatid na nakatanggap ng impormasyon ang Meycauayan City police na mayroong nagsusugal ng Lucky 9 sa Barangay Malhacan,Meycauayan kaya sinalakay ng awtoridad ang lugar at mahuli sa akto ang apat na suspek na wala nang nagawa nang malasin sa nilalarong sugal na Lucky 9.
Hindi rin nakapalag ang apat pang suspek nang maaktuhan din ng Malolos City police na naglalaro ng Tong-its kaya kaagad sila inihawla at narekober sa kambal na operasyon laban sa sugal sa dalawang siyudad sa Bulacan ang dalawang set ng playing card at bet money sa ibat-ibang denominations.
Nakumpirmang pinalalakas pa ng Bulacan PNP ang kampanya laban sa illegal gambling partikular ang mga ilegal na tupada na talamak sa Bulacan lalo na tuwing araw ng Sabado at Linggo na tinututukan ngayon ng pulisya. MARIVIC RAGUDOS