MINDANAO LIGTAS SA AFGANISTAN SPILLOVER

HINDI aabot sa Pilipinas partikular sa Mindanao ang kaguluhan sa Afghanistan, pagtitiyak ni Philippine National Police (PNP) Chief, Gen. Guillermo Eleazar.

Sinabi ng heneral na nanatiling ligtas ang Mindanao at kontrolado pa rin nila ang sitwasyon sa Mindanao.

Nabatid na tugon din ito ni Eleazar sa babala ni Philippine Institute for Peace, Violence and Terrorism Research chief Rommel Banlaoi na posibleng umabot sa Mindanao ang nangyayaring tensyon sa Afganistan.

Maaari aniya kasi iyong makahikayat ng mga lokal na terrorista para magsagawa ng mga pag-atake o sumakay sa kaganapan.

Magugunitang base sa impormasyon ng PNP at Armed Forces of the Philippines (AFP) na may ilang Islamic militant ang nagsanay at lumaban Afganistan at bumalik sa Pilipinas at nagtatag ng extremist group na nagging Abu Sayyaf.

“I assure the public that the police and military will not allow a spillover of the Afghan conflict. Hindi namin hahayaan na makapaghasik ng kaguluhan sa bansa ang mga lokal na terorista para sabayan ang gulo sa Afghanistan,” ani Eleazar

Ayon pa sa heneral, mahigpit ang ugnayan sa pagitan ng PNP at ng AFP para mapigilan ang anumang banta ng pag-atake na posibleng gawin ng mga lokal na terroristang grupo.

“Sa ngayon, maayos at kontrolado natin ang sitwasyon doon. Patuloy ang ating koordinasyon sa militar para magbantay at matiyak na hindi makapagsasagawa ng anumang pag-atake ang mga local terrorist groups sa Mindanao,” wika ni Eleazar.

Pagagarantiya pa ni PGen Eleazar na mananatiling naka-full alert ang PNP at paiigtingin ang kanilang intellegence gathering operations para matiyak na walang mangyayaring spillover ng tensyon sa Afganistan sa katimugang bahagi ng bansa. VERLIN RUIZ