ALBAY-PATAY ang isang kasapi ng organized crime syndicate sa ikinasang law enforcement operation ng mga tauhan ng PNP-Police Regional Office 5 sa Libon sa lalawigang ito.
Ayon kay PNP-PRO5 Regional Director BGen Jonnel Estomo, kinilala ang napatay sa engkuwentro na si Rolly Saysay na pinsan ng lider ng crime group na si Gilbert Concepcion bandang alas- 4 kahapon ng madaling araw.
Sugatan din ang kasamahan ng suspek na nadakip matapos na abandonahin ng kanilang mga kasama sa pagtakas palayo sa encounter site.
Sa pahayag ni Maj Malou Calubaquib, tagapagsalita ng PNP-PRO5, habang nasa kalagitnaan ng operasyon ay biglang sinalubong ng sunod-sunod na putok ang pinagsamang operatiba ng RMFB5, RIU5 SCIT at RMU5 na nag- ooperate sa Brgy Tambo, bayan ng Libon.
Samantala, nitong Enero 18, isang miyembro naman ng concepcion criminal group ang boluntaryong sumuko at ipinahiwatig ang kanyang pakikipagtulungan upang tugisin ang lider at iba pang kaanib nito.
Itinago ito sa alyas na “Leo” na ngayon ay nasa pangangalaga na ng pulisya para sa kaukulang disposisyon at para na rin sa kanyang seguridad.
Patuloy ang PNP-PRO5 sa pagtupad sa mandato nitong buwagin ang iba’t ibang kriminal at rebeldeng grupo sa rehiyon.
Nakatuon ito sa pagpapanatili ng katahimikan at pagbuo ng magandang kinabukasan para sa mga henerasyon pang darating. VERLIN RUIZ