CAMARINES NORTE-MULING nakapuntos ang mga tauhan ni PNP-Police Regional Office 5 Director Brig.Gen.Jonnel Estomo sa pagpapatuloy na operasyon kontra iligal na droga nang madakip ang isang kasapi ng notoryus na Gutierrez Drug Group sa lalawigang ito.
Kinilala ni Estomo ang nadakip na bigtime drug personality na si Marvin Diangco Abihay, 42-anyos, may asawa, driver at residente ng P-Bayabas Brgy.Gubat, Daet, Camarines Norte.
Ayon kay Bicol PNP Chief, bandang alas-2:55 kamakalawa ng hapon nang sinalakay ng kanyang mga tauhan ang Travellers Hotel, Purok 2, Brgy. Bagasbas, Daet, Camarines Norte.
Dito nadakip ng mga operatiba ng Daet MPS at Police Intelligence Unit- Camarines Norte Police Provincial Office sa pakikipag-ugnayan sa PDEA, ROV ang kanilang target na kasama sa talaan ng Regional Recalibrated Database on Illegal Drugs na isa ring miyembro ng Gutierrez Drug Group.
Sa inilatag na buy-bust operation, nakumpiska sa suspek ang 13 pakete ng plastik na naglalaman ng shabu na may timbang na 40 gramo na may street value na P300,000.00.
Matapos ang dokumentasyon sa mga nasamsam na ebidensiya agad na inilagay sa kustodiya ng Daet MPS.
Si Abihay ay nahaharap sa kasong paglabag sa RA9165 o ang “Comprehensive Dangerous Drugs Act of 2002”. VERLIN RUIZ