MIYEMBRO NG LGBT, SIGA NG KALYE. PAGIGING CHIEF TANOD, IPINAGKATIWALA

BRUSKO, matapang, iniilagan at kinakatakutan…. mga katangiang madalas hinahanap ng isang Kapitan para sa kanyang itatalagang Chief Tanod na magiging katuwang niya sa lahat ng gulo o tagapamayapa sa kanyang barangay na nasasakupan.

Subalit taliwas ito sa isang barangay sa Rosario, Cavite.

Ang kapitan ng Brgy. Ligtong 3 ay nagtalaga ng isang “chief tanod” na mainit na pinag-uusapan sa kasalukuyan.

Siya si Erwin Pajarillo, itinalaga bilang Chief Tanod noong Set­yembre 6, 2020. Taas-noong ipinapakilala ang pagiging miyembro niya ng LGBT.

Ipinagkatiwala sa kanya ang katahimikan at kaayusan ng kanyang barangay, subalit nagtaas-kilay ang ilan dahil sa kanyang pagkatao.

Sinukat ang kanyang kakayahan, binatikos at tinawanan. Kinutya at inalipusta.

Lahat sila ay nabigo.

Tinawanan lang ni Erwin ang mga paratang.

Isang taon na nga­yon mula nang iluklok siya, matagumpay niyang nagagampanan ang kanyang trabaho. Ginagalang siya’t nirerespeto.

Ang hindi alam ng ilan, bago pa siya ma­ging tanod ay na­ging Kabataang Bara­ngay siya noong 1992; Sangguniang Kabataan noong 1996; Barangay Health Worker noong 1997, Brgy Kagawad noong 2002 hanggang 2007. Naging Presidente rin siya ng Rosario Ca­vite Parents and Daycare Worker Federation mula 2014 hanggang 2020.

Sa kanyang malawak na karanasan, hindi maikakailang taglay niya ang katangiang hinahanap bilang isang Chief Tanod. Sobra pa nga kung tutuusin.

Hindi naman pala kailangan ang brusko. Basta tanggap ka ng tao anuman ang katayuan mo sa mundo. Ang mahalaga lang ay maging makatao, maka-Diyos, at nirerespeto.

Isa lamang si Erwin sa bukas-librong buhay na tunay na tumatatak sa isip ng tao. Hahangaan mo siya’t pasasalamatan. Mag-iiwan ng magandang kuwento at aspeto. SID LUNA SAMANIEGO

Related posts:

DISKRIMINASYON LABAN SA MGA LGBT PALALAWAKIN DAGDAG NA BENEPISYO SA BRGY. OFFICIALS AT TANOD MGA TANOD KASAMA SA AAYUDAHAN (Ngayong MECQ) CHECKPOINTS TANGGALIN, TANOD PINASASAILALIM SA TRAINING TANOD ISINAULI ANG NAPULOT NA WALLET NA MAY LAMANG PERA