BULACAN-ISANG tricycle driver ang nakorner ng awtoridad sa hot pursuit operation makaraang pagbabarilin nito at mapatay ang isang MMDA rescuer matapos ang mainitang pagtatalo sa parking area sa Barangay San Roque,Angat sa lalawigang nitong Miyerkules ng hapon.
Base sa report ng pulisya,nakilala ang naarestong suspek na si Marlon Binavice,42-anyos ng Barangay Pulo,San Rafael na nakaditine ngayon matapos pagbabarilin ang isang hindi pinangalanang MMDA rescuers at residente ng Barangay San Roque,Angat.
Naganap ang insidente pasado ala-5 ng hapon nitong Miyerkules nang magkaroon ng mainitang pagtatalo ang suspek at biktima dahil sa parking area ng traysikel sa tapat ng bahay ng huli.
Napikon ang suspek kaya panandaliang umalis at nang bumalik ay armado na ito ng baril saka pinagbabaril ang biktima na nagawa pang maisugod sa pagamutan ngunit hindi na ito naisalba bunga ng mga tama ng bala sa katawan.
Tumakas ang suspek ngunit nakorner din ito sa hot pursuit operation ng Angat police at narekober sa kanyang pag-iingat ang isang caliber 38 revolver na may limang bala at ang traysikel na ginamit sa pagtakas.
Lumilitaw na matandang alitan na ang motibo ng pamamaril at nahaharap ngayon sa kasong murder at violation of Omnibus Election Code ang suspek. MARIVIC RAGUDOS