MOST WANTED NG ORMOC NASAKOTE

NADAKIP ng Caloocan City Police ang kinikilalang wanted ng Ormoc dahil sa kasong panghahalay matapos malambat sa halos 11-taong pagtatago sa Caloocan City.

Ayon kay NPD Director BGen. Jose Santiago Hidalgo, Jr. ang akusadong si Melvin Jumao-as, 30-anyos, tubong Leyte at residente ng Purok 6, Calapakuan, Zambales ay sangkot din sa serye ng mga motornapping incidents sa Caloocan City at kalapit na probinsya at napag-alaman na sub-lea­der siya ng notoryus “Limos Motornapping Group”.

Nahuli ang suspek sa Langit Road, Brgy. 176, Bagong Silang dakong alas-8 ng umaga ng mga ope­ratiba ng District Special Operation Unit (DSOU) sa pangunguna ni P/Lt Melito Pabon sa ilalim ng pangangasiwa ni Lt. Col. Jay Dimaandal, kasama ang NPD- Regional Intelligence Unit of National Capital Region (RIU-NCR), NPD Highway Patrol Group (HPG) at Ormoc City Police Station.

Si Jumao-as ay tinaguriang Top 6 Most Wanted Person sa Ormoc City na may standing warrant of arrest na inisyu noong July 12, 2011 ni Hon. Judge Clinton C. Nuevo ng Ormoc City Regional Trial Court (RTC) Branch 12 para sa kasong Rape in relation to R.A. 7610 o Special Protection of Children Against Abuse, Exploitation and Discrimination na walang inirekomendang piyansa.

Batay sa record, sapilitang hinalay ni Jumao-as ang 16-anyos niyang kapitbahay sa loob ng isang bahay sa Sitio Tongonan, Brgy. Montereco, Ormoc City noong Oktubre 9, 2010 at matapos nito ay nagtago ang suspek makaraang magsampa ng kaso ang pamilya ng biktima kontra sa kanya.

Nakita ang suspek sa Bagong Silang, kasama ang grupo ng hinihinalang motornapping syndicate ay agad bumuo ng team ang DSOU sa pamumuno ni Lt. Pabon, sa koordinasyon ng Ormoc City Police Station saka ikinasa ang police operation na nagresulta sa pagkakaaresto sa suspek. VICK TANES