MOST WANTED SA KASONG RAPE TIMBOG!

LAGUNA – ARESTADO ng pinagsanib na kagawad ng Provincial Highway Patrol Team (PHPT) at Victoria PNP ang 55-anyos na construction worker makaraan ang ilang buwan nitong pagtatago sa batas kaugnay ng kinasasangkutan nitong kasong rape sa Sitio Sabang, Brgy. Concepcion, lungsod ng San Pablo.

Ayon sa ulat ni Laguna PNP Public Information Officer (PIO) PLt. Col. Chitadel Gaoiran, nakilala ang suspek na si Rolando Coleta Ybañez, napabilang sa Top 7, Most Wanted Person (Provincial Level), residente ng nasabing lugar.

Samantala, itinago naman sa alias na “Baby” ang biktima, 8 taong gulang, naninirahan sa bayan ng Victoria.

Bandang alas 7:00 Martes ng umaga ng magkasa ng Manhunt Bravo si Victoria Chief of Police PCapt. Christian Benedict Ebio Landicho, PHPT Chief PCapt. Charlie Reyes, at kanilang mga tauhan sa lugar bitbit ang Warrant of Arrest na ipinalabas ni Hon. Judge Mary Jean Tibo Cajandab, Presiding Judge, RTC Br 26, Sta. Cruz, Laguna kasunod ang isinagawang pag-aresto ng mga ito sa suspek na walang kaukulang piyansang (No Bail) inilaan ang korte para sa pansamantala nitong paglaya.

Sa talaan, lumilitaw na dakong alas 2:00 ng madaling araw nakaraang buwan ng Pebrero ng maganap ang insidente.

Sinabi ni Landicho na dating kasamahan sa trabaho ng Ama ng biktima ang suspek sa isang construction site sa bayan ng Victoria ng samantalahin umano nito ang panghahalay bago mabilisang tumakas makaraan ang insidente at makapagtago sa batas.

Kasalukuyang nakapiit ang suspek sa Victoria PNP Custodial Cell para harapin nito ang kasong paglabag sa New Anti-Rape Law of 1997 (RA8353) na isinampa sa kanya ng pulisya. DICK GARAY