CAVITE- ISA ang patay habang isa ang sugatan matapos sumalpok sa steel gate ang isang motorsiklo sa Barangay Bancaan sa bayan ng Naic sa lalawigang ito.
Sa kuha ng CCTV, makikita ang biglang pagsalpok ng single motorcycle sa bakal na trangkahan (gate) ng isang residential house na sa lakas ng impact ay bumukas pa ang bakal na gate at pumasok pa ang motorsiklo sa bakuran ng bahay.
Tumilapon naman ang mga sakay nitong sina alyas Rey, 17-anyos, driver, at backrider na si alyas Mica,15-anyos na kapwa nagtamo ng pinsala sa katawan at mabilis na isinugod sa ospital.
Sa kasamaang palad, idineklarang dead on arrival ang babaeng backrider na halos nabali ang kalahating katawan.
Ayon sa imbestigasyon, galing sa isang party ang dalawa at nasa impluwensya pa ng alak ang driver nang mangyari ang aksidente.
Gayunpaman, wala ng demandahang magaganap sa pagitan ng magkabilang panig na ayon sa pulisya ay pinag usapan na lang daw ang pananagutan ng isa’t isa sa nangyaring aksidente.
SID SAMANIEGO
