MULA SA BANGKETA, MAY PUWESTO NA

 PUNUMPUNO ng hamon sa buhay ang pinagdaanan ng ating tampok na star vendor sa isyu ng Pilipino MIRROR ngayon.

Ito ay dahil nagsimulang, pumalaot sa pagiging tindera sa bangketa ang ating bida sa edad na 17 at noong panahon na iyon ay sapatos ang kaniyang inilalako sa Baclaran.

Kilalalanin natin ang bida naman nga­yon ng mga gulay sa palengke ng Parang, Marikina City na si Alona De Guzman, at ang kanyang kaagapay sa pagtitinda ang kanyang asawa na si Ronald, na isang da­ting food crew Sa Duty Free  NAIA.

 

LUMAGAY SA TAHIMIK

Sa edad na 23 ay lumagay na sa tahimik si Alona  kapiling ang nagpatibok ng kanyang puso na si Ro­nald.

Siyempre pa, sa Baclaran niya nakatagpo ang napa­ngasawa  habang siya ay nagtitinda ng mga sapatos at sa araw-araw na dumaraan si Ronald bago pumasok sa Duty Free ay yumabong ang kanilang damdamin sa isa’t isa.

Nang magsama sila ni Ronald ay pumapasok  pa rin itoi bilang Food Crew  sa Duty Free habang ang ating bida ay patuloy na nagtitinda.

Hanggang magkaroon na sila ng anak ay huminto na si Ro­nald sa pagpasok bagkus ay lumikas na sila papuntang Marikina City dahil na rin tatlo na ang naging bunga ng kanilang pagmamahalan.

 

NAGING PAYAK ANG BUHAY SU­BALIT KONTENTO

Hindi man agad sila nagkaroon ng sariling bahay ay masaya naman silang mag-asawa dahil napag-aaral nila ang tatlong anak na sina Jhon Patrick,;  Pamela,  na kapwa nasa highschool na at ang kanilang bunso na si Patricia..

Limang taon na silang nagtitinda ng gulay sa palengke ng Parang na sinimulan lang nila sa puhunang P240 subalit doon na rin sila nakatira sa kanilang puwesto sa kahabaan ng palengke ng nasabing lugar .

Isinasara lang nila ang kanilang puwesto ng gulay dahil ginawa na nilang tirahan at sa labas na lang sila nagtitinda, kayat hands on silang mag-asawa sa kanilang maliit na negosyo.

 

NAGPAPASALAMAT SA NATAG­PUANG NEGOSYO

Bagaman aminadong maliit ang negosyo, labis-labis ang pasasalamat ni Alona sa natagpuang “blessings” dahil ito aniya ang tumutustos sa kanilang pangangailangan sa buhay.

“Kung hindi dahil sa pagtitinda naming ng gulay, hindi kami makakaraos, at lubos ang pasasalamat naming sa Maykapal dahil sa mga biyayang aming nakakamit. Masarap magbanat ng buto kung para rin lamang sa pamilya at kahit paano ay may pantustos kami,” ayon pa kay Alona.

Nang tanungin ng manunulat na ito kung magkano na ngayon sa palagay nila ang puhunan ng  kanilang paninda na sinimulan lang nila noon sa P240 ay masayang sinagot nila ng humigit kumulang P4,000.

Nakakasama na rin nilang magtinda at magpalit palit sa pagbabantay ang kanilang tatlong anak kapag walang pasok,  habang ang ama ng tahanan ay nama­makyaw ng mga gulay. ELMA MORALES