MAGUINDANAO DEL NORTE- AGAD na binawian ng buhay ang isang Municipal Councilor natapos na pagbabarilin ng mga hindi nakilalang suspek na naganap sa lalawigang ito.
Sa report ng pulisya, ang biktima ay nakilalang si Municipal Councilor ng Northern Kabuntalan Tans Nanalon, 43-anyos at may asawa.
Napag-alaman na bago naganap ang pamamaril, ang biktima ay galing sa isang peryahan at dumaan ito sa isang kamag-anak na ikakasal sa Barangay Damatog sa bayan ng Northern Kabuntalan nang bigla na lamang dumating ang mga armadong lalaki at walang habas na pinaulanan ng bala ang biktima gamit ang kalibre 45 pistola.
Agad na binawian ng buhay ang biktima sanhi ng mga tinamong tama ng bala sa iba’t ibang parte ng katawan nito habang ang mga suspek ay agad na tumakas dala ang mga armas na ginamit patungo sa di matukoy na lugar.
Hiling naman ng mga kaanak ng biktima ay agad nilang makamit ang hustisya sa pagkamatay ng biktima habang kinondena ng SB Northern Kabuntalan kabilang si Mayor Datu Ramil ‘’ Ombra’’ Dilangalen ang naturang pangyayari.
Inaalam ng mga awtoridad ang motibo sa naganap na pamamaslang kung may kinalaman sa politika o personal na kaaway ang biktima.
Ayon naman sa Northern Kabuntalan PNP, may mga sinusubaybayan na mga person of interest na posibleng may kinalaman sa pamamaslang sa biktima. EVELYN GARCIA