SADYANG kinatatakutan ng mga kababaihan ang myoma (fibroid) dahil walang gamot para rito at wala ring tukoy na dahilan kung bakit ito tumutubo sa babae.
Alam n’yo bang tatlo sa apat na kababaihan ang nagkakaroon ng myoma minsan sa kanilang buhay ngunit ang karamihan ay walang dinaramdam na sintomas.
Ang myoma, base sa pag-aaral, ay ang pagkakaroon ng bukol sa loob ng matris na hindi naman nauugnay sa mataas na tiyansang magka-uterine cancer at napakabihira namang maging kanser.
Ang labis na nakapapangamba ay hindi matukoy ang tunay na kadahilanan ng myoma at maraming kababaihan na may myoma ang walang dinaranas na sintomas.
Gayunman, maaaring magdulot ng mga sintomas depende sa laki, lokasyon sa matris (submucosal, subserosal at intramural), at kung gaano sila kalapit sa iba pang organs na nasa pelvic area.
Ang uterus o matris ay isang organong hugis peras na nasa bandang puson, sa pagitan ng pantog at rectum. Kasama nito ang puwerta, mga obaryo, at lagusan ng itlog na bumubuo sa sistemang reproduktibo ng mga kababaihan. Ito ay tinatawag ring sinapupunan o bahay-bata.
Pangunahing tungkulin ng matris ang pangangalaga sa kalusugan ng sanggol at maayos na pagbubuntis.
Ang pag-iwas sa myoma ay maaaring mahirap, subalit maliit lamang na porsiyento ng tumor na gawa nito ang nangangailangan ng agarang lunas.
SINTOMAS NG MYOMA
- Malakas na buwanang-daloy, mas mahabang buwanang-daloy (mga 7 o higit pang araw ng pagdurugo).
- Pananakit o makirot na pakiramdam sa bandang puson o pantog.
- Paulit-ulit na pagkalaglag ng dinadala.
- Madalas na pag-ihi, mahapding pag-ihi, mahirap ilabas ang ihi o parang binabalisawsaw.
- Pagbabago sa pagdumi partikular ang pagtitibi.
- Pananakit ng likod, balakang, hita o mga paa.
- Makirot o masakit na pakikipagtalik.
PARA IWASAN:
Kumain ng masustansiyang pagkain tulad ng isda, mani, gulay at prutas na mataas sa Omega-3, mabuting Kolesterol, Bitamina at Mineral. Regular na sumailalim sa mga karaniwang pagsusuri para sa kalusugan ng kababaihan tulad ng Pap Smear. Magpabakuna laban sa mga karaniwang sakit ng kababaihan.
POSIBLENG DAHILAN
- Genetic changes o pag-iiba-iba sa namamana nating mga katangian mula sa ating ninuno.
- Hormones. Ito ay mga kemikal sa katawan na may epekto sa mga parte nito. Ang estrogen at progesterone, ang 2 hormone na konektado sa pagde-develop ng uterine lining kada buwanang-daloy na preparasyon para sa pagdadalang-tao ang nagpapakitang tumutulong sa pagtubo ng myoma.
- Iba pang mga growth factors tulad ng insulin-growth factor na tumutulong sa pagpapanatili sa pagpapagana sa katawan, ay maaaring makaapekto sa pagtubo ng myoma.
PANANDALIANG LUNAS
Gonadotrophin-releasing hormone (GnRH) agonists. Ang mga gamot na ito ay linulunasan ang myoma sa pamamagitan ng pagpigil sa paggawa ng katawan ng estrogen at progesterone, at nilalagay ka sa pansamantalang postmenopausal na estado.
Dahil dito, titigil muna ang iyong buwanang-daloy, lumiliit ang myoma at nag-iimprove ang anemia.
Progestin-releasing Intrauterine Device (IUD). Ito ay nakapipigil sa malalakas na buwanang-daloy dulot ng myoma. Nababawasan ng IUD ang sintomas ngunit hindi nito napapaliit o napapawala ang myoma.
Ibang mga medikasyon.
Maaari ring irekomenda ay ang oral contraceptives (OCPs) o progestins na tumutulong magkontrol sa napakalakas na pagdurugo ngunit hindi nila pinapaliit ang myoma. Maaari ring ibigay ang non-steroidal anti-inflammatory drugs (NSAIDS) tulad ng Ibuprofen na epektibo sa pagbawas ng sakit.
Ang pag-inom ng Bitamina at Iron ay maaari ring irekomenda sa iyo kapag meron kang anemia at napakalakas na pagdurugo.
Operasyon. Ang Hysterectomy ay ang pagtanggal ng buong matris kasama na rito ang mga tubo at obaryo.
Kung wala ka nang planong magkaroon ng anak, ito ay epektibo; at dahil tatanggalin na ang buong matris, hindi ka na makararanas ng pagreregla o pagdurugo. Subalit dahil gumagawa ng mga hormone ang obaryo na tumutulong protektahan ka laban sa sakit sa puso at mahinang buto, pinakamahusay na hangga’t maaari na huwag itong tanggalin. VICK TANES
Comments are closed.