ISABELA-DEAD on the spot ang dalawa katao at sugatan ang labindalawang indibidwal makaraang madaganan nang bumaligtad na center car farm equipment sa Barangay Balasig, Cabagan sa lalawigang ito.
Ayon sa Cabagan Police Station, lulan umano ng center car farm equipment o kuliglig ang 14 katao na pawang magkakamag-anak na galing sa isang death anniversary sa Fugo, Tumauini, Isabela.
Ayon sa PNP Cabagan, patungo Ang mga ito sa Barangay Balasig nang nawalan ng kontrol sa manibela ang drayber na kinilalang si Erwin Datul na nagresulta ng pagbaligtad ng center car farm equipment at nadaganan ang mga sakay nito.
Dead on the spot ang pasaherong si Rosalyn Agabin at idineklara ring patay ang isa pang sakay nito.
Isinugod naman sa pagamutan ang 12 iba pa kasama na ang driver at mga sakay nito na sina Ethan Dale Gammad, Monsing Datul, Marcelo Agabin, Rodolfo Agabin; Bernardo Laggui, Marita Laggui, Cris mae Mercado; Waldimar Baui; Flordeliza Baui; Rowena Gammad at Leon Patrick Gammad na pawang residente ng San Bernardo, Cabagan, Isabela.
Patuloy na iniimbestigahan ng PNP Cabagan ang naturang aksidente. IRENE GONZALES
