(Nakadaong na cargo ship sa Cavite City Bay area) 12 PINOY CREW POSITIBO SA COVID-19

NAGSAGAWA ng mahigpit na seguridad ang tropa ng Philippine Coast Guard (PCG)-Cavite sa nakadaong na cargo ship na Athens Bridge na may 12 tripulanteng Pinoy na positibo sa COVID-19 upang sinigurong walang makalalapit na mga hindi awtorisadong sasakyan pandagat o pangisda habang ito ay nakahimpil sa may 10 kilometrong layo sa baybaying dagat ng Cavite City kahapon ng umaga.

Base sa tala ng PCG-Cavite, nagmula ang nasabing container ship sa Vietnam bago pumalaot patungong Pinas kung saan ito pansamantalang dumaong sa karagatang sakop ng Ca­vite City nitong Mayo 5.

Gayunpaman, bago pa makadaong ang cargo ship ay nagka COVID-19 na ang 12 tripulante mula sa kabuuang 21 Pinoy crew kaya’t humingi ng tulong sa kinauukulang ahensiya ng pamahalaan.

Sa tulong ng mga tauhan ng PCG at Bureau of Quarantine ay naisugod naman sa pagamutan ang dalawang tripulante na sinasabing nasa kritikal na kalagayan habang ang 10 naman ay asymptomatic kaya’t nag-self qua­rantine na lamang sa kani-kanilang cabin sa loob ng 14 days quarantine period.

Samantala, ang siyam na tripulante ng cargo ship ay negatibo sa COVID-19 kung saan nananatili sa loob ng barko na walang katiyakan kung kailan papayagan ng PCG State Control na makapag unload ng mga container sa port of Manila.

Sa pagmamatyag o inspection na ginawa ng PCG Cavite Station sa paligid ng cargo ship kahapon ng umaga, napansin na may dalawang tripulante ng barko ang dumungaw at kumaway pa sa mga kawani ng PCG na sakay ng dalawang speedboat kasama ang ilang media personnel.

Ayon kay PCG Ca­vite – Station Commander Lt. Michael Encina, patuloy ang pagbibigay ng maritime assistance sa Athens Bridge para na rin sa proteksiyon ng iba pang tripulanteng Pinoy na negatibo sa virus. MHAR BASCO