CAVITE- PATAY ang isang lalaki matapos na aksidente nitong mahawakan ang live wire na nasa puno ng kaimito habang namimitas kamakalawa sa Brgy Palangue, Central Naic sa lalawigang ito.
Kinilala ng pulisya ang biktima na si alyas Julian, nasa hustong gulang residente ng nasabing lugar.
Sa imbestigasyon ng pulisya, alas-11 ng umaga nang maganap ang insidente sa loob ng INC compound ng nasabing barangay kung saan nagpaalam ang biktima sa kapatid nito na mamimitas umano ito ng kaimito.
Binawalan umano ang biktima na huwag ng umakyat ng puno subalit itinuloy pa din nito ang pag-akyat.
Sa ilang sandali lang, nakita ng kapatid ang katawan ng biktima na halos nangingitim at wala ng buhay.
Sa pahayag ng kapatid ng biktima, posible umanong nahawakan nito ang live wire na nasa puno ng kaimito dahilan upang makuryente ito.
SID SAMANIEGO
