PASAY CITY – ARESTADO ang tatlong miyembro ng pamilya na pawang mga nasa drug watchlist sa buy bust operation ng Station Drug Enforcement Unit (SDEU) ng Pasay City police kamakalawa sa lungsod.
Kinilala ni Pasay police chief Police Colonel Bernard Yang ang mga arestado na sina Amelia Sioson, 70-anyos; Ricardo Cecilio, 59, at Richelle Cecilio, 32, pawang residente ng Barangay 187 Zone 16, Pasay City.
Base sa report ni Yang na isinumite sa Southern Police District (SPD), nangyari ang pagkakaaresto sa mga suspects sa pamamagitan ng ikinasang buy bust operation bandang alas-5:45 ng hapon sa tinutuluyang bahay ng mga suspek.
Napag-alaman na nakatanggap ng impormasyon ang hepe ng Pasay police SDEU na si P/Captain Deni Mari Pedrozo at ng kanilang mapatunayan ang ilegal na aktibidad ng pangunahing suspect na si Melia ay agad na nagkasa ang pulisya ng isang buy-bust operation na naging sanhi ng pagkakaaresto ng mga suspek.
Nakumpiska sa posesyon ng mga suspek ang 35 plastic sachets na naglalaman ng pinaghihinalaang shabu at nakalagay sa isang maliit na plastic bag na may timbang na 37.8 gramo na nagkakahalaga ng P250,000; isang kulay violet na coin purse; isang kulay grey na rectangular steel box; cash na nagkakahalaga ng P1,800 at ang P500 buy bust money.
Ang mga nakumpiskang pinaghihinalaang shabu ay dadalhin sa SPD Crime Laboratory para sumailalim sa chemical analysis samantalang ang mga suspek ay kasalukuyang nakapiit sa custodial facility ng SDEU habang inihahanda ang pagsasampa ng kaukulang kaso laban sa kanila. MARIVIC FERNANDEZ
Comments are closed.