NASAWI SA C-130 TRAGEDY PUMALO NA SA 52

NADAGDAGAN pa ang nasawi sa C-130 tragedy, ayon sa Armed Forces of the Philippines (AFP).

Sa impormasyong nakarating sa PlLIPINO Mirror, pumalo na sa 52 ang nasawi sa pagbagsak ng newly refurbished na C-130 Hercules Cargo plane na may body number 5125.

Samantala, sinimulan ng binuong investigating task group ang pag analisa sa nilalaman ng black box o flight data recorder ng nasabing air craft.

Ayon kay AFP Chief of Staff General Cirilito Sobejana walang inaksayang panahon ang binuong probe team mula 220th airlift wing matapos na matagpuan ang black box bandang alas-11:00 ng umaga sa Barangay Bangkal malapit sa Jolo Airport.

Una rito inihayag ni AFP Western Mindanao Command Chief LtGen. Corleto Vinluan na agad niyang ipinag-utos na ikordon ang one kilometer radius na saklaw sa binagsakan ng military transport plane at deklarang restricted area ito upang matiyak uncontaminated ang mga makakalap na ebidensiya.

Nabatid na nasa area ngayon ang investigating team mula sa 220th Airlift Wing at PAF Mobility Air Command.

Magugunitang agad na ipinag utos ni Defense Secretary Delfin Lorenzana ang pagsasagawa ng ‘full investigation’ sa pagbagsak ng C130 plane sa Sulu na ikinasawi ng 49 sundalo at tatlong sibilyan at ikinasugat din ng 47 sundalo na ang ilan ay nasa malubha pang kalagayan.

Sa isang panayam kay Gen Sobejana , sinabi niyang may nakausap siyang survivors na kumukumpirma sa mga naglalabasang balita na may mga tumalsik na sundalo at tatlong beses pang tumalbog ang C-130 bago sumalpok at sumabog. VERLIN RUIZ