Mga laro ngayon:
(La Salle Green Hills Gym)
12 noon – JRU vs Perpetual
3 p.m. – LPU vs CSB
TARGET ng season host College of St. Benilde at Lyceum of the Philippines University ang kanilang unang panalo sa NCAA Season 97 men’s basketball tournament ngayon sa La Salle Green Hills Gym.
Galing sa opening day defeat sa defending champion Letran, umaasa si CSB rookie coach Charles Tiu na makababawi ang Blazers sa kanilang 3 p.m. clash sa Pirates.
Kontra Knights, naging maganda ang simula ng CSB at umabante ng hanggang 12 points bago nalasap ang 63-67 pagkatalo sa opening day noong Sabado.
“Positive is we were able to compete but we are not happy with the result. We were outworked and that was unacceptable,” sabi ni Tiu.
Sasandal ang Blazers kina big man AJ Benson, Carlo Lim, Robi Nayve at transferee Will Gozum.
“Just reminding them to focus one game at a time. Not looking past Lyceum at all,” ani Tiu. “And for other guys to step up since we have some injured players.”
Samantala, ang Pirates ay mistulang anino ng koponan na nakapasok sa Finals noong 2017 at 2018.
Nasa ilalim ngayon ni neophyte coach Gilbert Malabanan, sinimulan ng LPU ang kampanya nito sa pamamagitan ng 76-84 loss sa San Beda, na malakas pa rin kahit walang oreign student-athlete noong Sabado.
Magsasalpukan naman ang Jose Rizal University at University of Perpetual Help System Dalta, dalawang koponan na nasa kanilang Season 97 debut, sa 12 noon curtain raiser.
Sa ilalim ng bagong broadcast partner GMA, ang mga laro ay mapapanood nang live sa GTV channel 11.
