MASASAKSIHAN na ang pinakaaabangang epic showdown ng mga eskuwelahan sa National Collegiate Athletic Association (NCAA) Season 98 Cheerleading Competition ngayong Linggo sa Rizal Memorial Coliseum na mapapanood sa GTV sa alas-2 ng hapon.
Ang mga magpapasiklab sa crowd sa kanilang makapigil-hiningang routines ay ang Golden Stags Cheerleading Squad ng San Sebastian College-Recoletos; Mapua Cheerping Cardinals ng Mapua University; Altas Perpsquad ng University of Perpetual Help System-Dalta; LPU Pirates Pep Squad ng Lyceum of the Philippines University; Letran Cheering Squad ng Colegio de San Juan de Letran; AU Chiefsquad ng Arellano University; JRU Pep Squad ng José Rizal University; Benilde Blazers Pep Squad ng De La Salle – College of St. Benilde; EAC Generals Pep Squad ng Emilio Aguinaldo College; at San Beda Red Corps ng San Beda University.
Sa huling kumpetisyon sa Season 95 ay nagpamalas ang AU Chiefsquad ng impresibong performance upang makopo ang kanilang ikatlong sunod na korona sa NCAA Cheerleading Competition.
Nagtapos na first runner-up ang Altas Perpsquad at second runner-up ang Mapua Cheerping Cardinals.
Ang tatanghaling cheerleading champion ngayong taon ay tatanggap ng Php 100,000, habang ang first runner-up at second runner-up ay mag-uuwi ng Php 75,000 at Php 50,000, ayon sa pagkakasunod.
Tatanggapin din ng champion teams at mga nagwagi sa iba’t ibang sporting events ng NCAA Season 98 ang kani-kanilang awards ngayong Linggo.
Ang mga ito ay kinabibilangan ng mga nanalo ngayong season sa Basketball (Men’s and Juniors), Volleyball (Women’s and Men’s), Volleyball Fiesta (Boys and Girls), Beach Volleyball (Women’s and Men’s), Swimming (Women’s and Men’s), Track and Field, Online Taekwondo (Women’s, Men’s, and Juniors), at Online Chess (Men’s and Juniors).
Ipapasa rin ng Emilio Aguinaldo College ang hosting rights sa José Rizal University para sa darating na NCAA Season 99.
Sina Synergy Sports host Martin Javier, Kapuso actress Rhian Ramos, at Track and Field star Maureen Schrijvers ang program hosts ng NCAA Season 98 Cheerleading Competition.
Magdaragdag din ng kasiyahan sa kapana-panabik na kumpetisyon ang lively performances ng PPOP Generation, VXON, 1st.One, at XOXO.
