NDRRMC, PAGASA NAGBABALA NG MGA PAGBAHA (Water level ng Magat at Angat dam tumataas)

NAGBABALA kahapon ang  PAGASA sa mga posibleng pagbaha na mararanasan dahil sa patuloy na pagtaas ng  water level sa Magat at Angat Dam dala ng dalawang low pressure areas na nagdudulot ng mga pag ulan at posibleng maging ganap na tropical storm.

Kasabay nito, nag release ng tubig ang Magat Dam bilang paghahanda sa posibleng epekto ng nararanasang mga pag ulan dulot ng 2 low pressure areas na pinatitindi pa ng umiiral na Northeast monsoon o Amihan.

Nabatid na binuksan ng Magat Dam operators ng may isang metro ang isang gate  ng dam bandang alas-9:00 kahapon ng umaga

Ayon sa PAGASA, posibleng maapektuhan ng pagpapakawala ng tubig ang mga bayan ng Ramon, San Mateo, Aurora, Cabatuan, Luna, Reina Mercedes, Burgos, Naguilian, at Gamu.

Ayon sa PAGASA  Hydrometeorology Division, ang channels ng  Cagayan River ay nasa  “above alert level” na maaaring maging sanhi ng  flashfloods dahil sa laki ng water volume na naiipon.

“The whole stretch of the Cagayan River inclu­ding major tributaries is likely to rise in the next 12 hours,” ayon sa PAGASA .

Kaugnay nito, nagpa­labas din ng babala ang National Disaster Risk Reduction Managament Council ( NDRRMC) hinggil sa mga inaasahang pag-ulan at pagbaha.

Pinaalalahanan nito ang publiko na maghanda sa posibleng flash floo­ding at landslides dulot ng dalawang low-pressure areas (LPAs) na nasa loob na ng  Philippine Area of Res­ponsibility at  Amihan na nakaka apekto sa Northern Luzon.

Bandang alas  9:00 ng umaga kahapon ay namataan ang unang  LPA may 140 km west northwest ng  Puerto Princesa City, Palawan habang ang ikalawang ay namataan 35km northeast ng  Daet, Camarines Norte.

Nagsimulang ulanin ng malakas ang Eastern Visayas, Bicol Region, Quezon, Aurora, Bulacan, Rizal, Mindoro provinces, Marinduque, Romblon, Dinagat Islands, Calamian Islands, at Kalayaan Islands habang light to moderate na paminsan minsan ay malakas na pag-ulan ang nararanasan sa mainland Cagayan Valley, Metro Manila, at nalalabing bahagi ng  Visayas, Northern Min­danao, Zamboanga Peninsula, at nalalabing bahagi ng Central Luzon, CALABARZON, MIMAROPA, at Caraga.

Kaugnay nito, nagpalabas na rin ng flood precaution ang  operator ng Angat Dam. VERLIN RUIZ