CAVITE- ISANG kilalang negosyante ang puwersahang kinidnap ng limang armadong lalaki habang sakay ng kanyang SUV ilang metro ang layo sa bahay nito sa Purok 2, Barangay Santol, Silang sa lalawigang ito nitong Lunes ng hapon.
Kinilala ng mga awtoridad ang biktima na si Oliver dela Cruz, 42-,anyos, may- asawa at buy and sell dealer ng mga mamahaling sasakyan sa lalawigan ng Cavite.
Sa masusing imbestigasyon ng Silang Cavite intel operatives, binuntutan ng mga kidnaper ang sasakyan ni Dela Cruz mula sa highway patungo sa tahanan at.mabilis na hinarang sa lugar na walang masyadong nagdaraan.
Sapilitan umanong pinasok ng mga armadong grupo ang blue gray Ford Eco sport na may plate number DVZ- 6630 at agad na minaneho patungong Aguinaldo Highway kasunod ang sasakyan ng mga suspek na isang gray Toyota Vios na may numerong CVF- 7396.
Makaraan ang may isang oras, sinabi ng pamilya sa mga imbestigador na isang tawag sa cellphone mula ng mga suspek ang nagsabi na makakalaya lamang si Dela Cruz kapag nagbigay ng P300,000.
Nagsasagawa pa nang malalim na pagsusuri ang mga pulis hinggil sa naturang insidente. ARMAN CAMBE