(OFWs natetengga) DAGDAG NA TESTING BOOTH SA NAIA HINILING

KINAKAILANGAN ng karagdagang PCR/swab testing booths para sa COVID-19  sa mga paliparan upang hindi matengga ng mahabang oras ang mga  overseas Filipino worker (OFW) pagdating sa Ninoy Aquino International Airport (NAIA).

Ito’y matapos na maghintay nang matagal ang mahigit  sa 100 OFWs  na dumating sa NAIA  terminal 1. Mahabang pila at oras ang binibilang bago sumailalim sa PCR/swab test  habang ang iba naman  ay hindi makababa sa eroplano dahil overcrowded ang arrival area.

Dumating na magkakasabay sa NAIA terminals 1, 2 at 3 ang  2,320 repatriated OFWs mula sa Saudi   na  nakaranas  na maghintay ng ilang oras bago naisalang sa rapid test.

Dinala ang mga ito sa holding area upang sumailalim sa  swab testing bilang pagsunod sa mandatory protocol ng  COVID-19 Inter-Agency Task Force (IATF) bago dalhin sa mga government facility ng  Philippine Coast Guard (PCG)  para 14 days quarantine.

Maging ang mga OFW na dumating mula sa  Abu Dhabi, Dubai, Jeddah at Malaysia ay naghintay nang mahabang oras  bago nakababa sa kanilang mga sinakyang eroplano dahil  nagkabuhol-buhol ang mga pasahero sa loob ng arrival area.

Sa kasalukuyan ay 12 ang PCR/swab testing booths sa tatlong terminal  kaya kinukulang ito kapag nagkasabay-sabay ang returning OFWs.

Ayon kay Manila International Airport Authority (MIAA) General Manager Ed Monreal, nahihirapan ang kanyang mga tauhan sa arrival time o spacing  ng bawat eroplano  sa landing area  dahil kinokonsidera rin nila ang departure ng  commercial at sweeper flights  na may lulang  stranded foreigners at returning OFWs.

Ginamit na nila ang ibang parte ng departure areas bilang swab testing booth para mapadali ang isinasagawang swab testing sa mga dumarating  na OFWs. FROI MORALLOS