(Olympic champ ginulantang) PAALAM SIGURADO NA SA BRONZE

Carlo Paalam

APAT na medalya na ang maiuuwi ng Pilipinas sa Tokyo Olympics.

Ito ay makaraang gulantangin ni Filipino boxer Carlo Paalam si Olympic at world champion Shakhobidin Zoirov ng Uzbekistan sa quarterfinals ng men’s flyweight division ng boxing event ng Tokyo Olympics Martes sa Kokugikan Arena.

Sa panalo ay umabante si Paalam sa semifinals upang makasiguro sa bronze medal.

Si Zoirov ay gold medalist sa flyweight division kapwa sa 2016 Rio Olympics at sa 2019 AIBA World Championships.

Subalit hindi ito alintana ni Paalam kung saan tinalo niya ang boxing champion makaraang itigil ang laban sa 1:40 mark ng second round nang magkaumpugan ang dalawang boksingero.

Apat na judges ang pumabor kay Paalam sa scorecards habang ang isa ay draw.

“Unang-una po sa lahat, nagpapasalamat po ako sa Panginoon sa pagbibigay ng lakas sa akin para maipanalo ko ang laban na ito. Maraming salamat din sa tiwala ng mga coaches ko, sa ABAP at sa PSC. Salamat din po sa mga sumusuporta po sa akin at sa aming lahat na mga atletang Pilipino. Sabi nga po ng Panginoon, ‘Makakaya mo, basta kasama mo ako,’” sabi ni Paalam.

Susunod na makakasagupa ni Paalam si home bet Ryomei Tanaka ng Japan.

Sa panalo ni Paalam ay nahigitan na ng Team Philippines ang performance nito sa 1932 Los Angeles Games kung saan tatlong Pinoy athletes ang nag-uwi ng medalya.

Bukod sa 23-anyos na si Paalam, ang iba pang medalists ay sina weightlifting gold medalist Hidilyn Diaz, silver medalist Nesthy Petecio at boxer Eumir Marcial. CLYDE MARIANO

2 thoughts on “(Olympic champ ginulantang) PAALAM SIGURADO NA SA BRONZE”

Leave a Reply

Your email address will not be published. Required fields are marked *