ONLINE CLASSES HINDI PABOR SA MGA MAHIHIRAP

HINDI pabor ang lahat sa panukalang ‘online  classes’ o pag-aaral ng mga estudyante sa kolehiyo sa kanilang mga tahanan sa pamamagitan ng ‘internet’ bilang tugon sa krisis na likha ng kasalukuyang COVID-19 pandemic na pumuwersa sa gobyerno upang ilatag ang ‘community lockdown’ at sapilitang panatilihin at huwag lumabas ng bahay ang mga mamamayan para makontrol ang pagkalat ng sakit.

Binansagan ni House Ways and Means chairman, Rep. Joey Sarte Salceda ng Albay ang ‘online classes’ na ‘anti-poor’ o hindi pabor sa mga mahirap, na sinasang-ayunan naman ng mga grupo ng estudyante dahil maraming mahihirap na mag-aaral ang walang kompyuter at ‘internet’ sa kanilang tahanan.

Pinayuhan ni Salceda ang Commission on Higher Education (CHEd) na huwag payagan ang ‘online classes’ ngayong may krisis dahil hindi rin ito magiging kapaki-pakinabang sa mga mag-aaral. “May dalawang milyong mag-aaral sa mga pribadong kolehiyo, at 90% ng mga magulang nila at mga nagtatrabahong estudyante ay nawalan ng trabaho at kita sa nakaraang tatlong buwan upang tustusan ang gastos sa natigil na ikala-wang semestre nila,” sabi niya.

Sa isang patalastas kamakailan, sinabi ng CHED na hiniling nito ang mga kolehiyo at pamantasan na gumamit sila ng mga alternatibong sistema ng pag-aaral, kasama ang ‘online learning’ at “hindi nila ito ipagbabawal.”

Ayon kay Salceda, na co-chairman din ng House Economic Stimulus Response Package Cluster, maaaring pinipilit ng mga kolehiyo ang mga mag-aaral nila na pumayag na sa ‘virtual classes’ upang mabigyang katwiran ang paniningil nila ng  tuwisiyon na magiging dagdag na pabi-gat pa sa mga pamilyang nawalan na nga ng hanap-buhay at kita.

Sinabi ng mambabatas na sa pagbubukas ng sesiyon ng Kamara sa susunod na linggo, ihahain niya ang panukala nilang ‘Economic Stimulus Act’ na maglalaan ng ‘Tertiary Education Subsidy’(TES) sa lahat ng mga mag-aaral na dating wala nito, kung hindi ipipilit ng mga pribadong paaralan ang ‘online classes’ na gusto nila.

“Hindi patas at makatwiran ang ‘online’ na pag-aaral dahil sa ‘digital divide’ kung saan maraming mahihirap na pamilya ang walang kaka-yahang bumili ng mga ‘laptop’ o ‘desktop’ na kompyuter na kailangang gastahan pa ng regular na ‘load.’ Bukod dito, hindi rin magiging mabisa ang ‘online learning’ dahil sa napakabagal na  interet sa bansa na lalo pang pinabagal ng kasalukuyang krisis,” sabi niya.

Binigyang diin din ni Salceda na ang pagtulak sa ‘online learning’ ay lalo pang magpapabigat sa krisis na pinapasan ng mga mag-aaral at pamilya nila. “Ikokompromiso pa nito ang ‘mental health’ o kalusugan sa pag-iisip ng marami, at babaliin ang mga regulasyon ng Inter-Agency Task Force (IATF) kaugnay sa ‘social distancing’ gaya ng paglabas ng bahay para magpa-‘load’ na hindi naman pagkain o medesina,” dagdag niya.

Ayon sa mambabatas, ang pinakamabuting gawin ay ipasa na lamang lahat ng mga mag-aaral sa kolehiyo ngayong semestre. Nauna na niyang ipinanawagan ito bilang tugon sa krisis na likha ng COVID-19 at “ilalaan na lamang ng  Kamara ang P16 bilyon mula sa ‘Tertiary Education Subsidy 2020’ na nakapaloob sa General Appropriations Act” ngayong taon upang ayudahan ang mga apektadong mag-aaral.

Nakatalagang ipasa ng Kamara sa lalong madaling panahon ang ‘Economic Stimulus Act,’ isang estratihiya tungo sa matatag na “structural response’ at mga repormang pang-ekonomiya upang mapanatili ang tiwala ng mga negosyo at manggagawa sa kakayanang bumangon ng bansa sa pananalasa ng COVID pandemic. Pangunahing layunin ito ang “walang maiiwan,” panatilihing nakalutang ang mga negosyo na magbibigay trabaho sa mga manggagawa, at bumangon at patuloy na sumulong ang ekonomiya ng bansa.