CAVITE – KALABOSO ang magkasabwat na drug couriers makaraang makumpiskahan ng P1.380 milyong halaga na shabu sa inilatag na buy-bust operations ng mga operatiba ng PDEA RSET 1, RSET 2, PDEA-Cavite PO at Dasmarinas CPS sa harapan ng Promenade Park sa Brgy. Burol Main, Dasmariñas City sa lalawigang ito kamakalawa ng gabi.
Nahaharap sa kasong paglabag sa RA9165 ang mga suspek na sina Norjina Sumagina Unte, 35-anyos at alyas Ashary, 16-anyos, kapwa nakatira sa Brgy. Datu Esmael sa nasabing lungsod.
Bukod sa 200 gramo na shabu na may street value na P1, 380,000 na nasabat sa mga suspek ay nakumpiskahan din ang mga ito ng isang cellphone at P1K bill na marked money na ginamit sa drug bust.
Sa inisyal na ulat, lumilitaw na nakipag-deal ang mga suspek sa isang operatiba ng PDEA na nagpanggap na poseur-buyer kung saan naganap ang buy-bust operation.
Isinailalim na sa chemical analysis ang 200 gramo na shabu habang nasa custody ng PDEA Cavite ang mga suspek para sa inquest proceeding sa Prosecutor’s office. MHAR BASCO