QUEZON PROVINCE-AABOT sa P1.5 milyong halaga ng ilegal na droga, baril at mga bala ang nasabat ng Lucena PNP sa isinagawang drug buy bust operation na ikinaaresto ng isang ginang at isang lalaki sa may Purok Maligaya bahagi ng Barangay 5, Lucena City.
Kinilala ni Lt Col Reynaldo Reyes ang dalawang nadakip na sina Suzette Parto y Sumapang, 29-anyos. residente ng Barangay 5, Lucena at Alvin Abellera y Pera, 28-anyos ng Purok Talabis, Brgy Ibabang Iyam, lungsod ng Lucena.
Base sa report ng Lucena PNP kay Provincial Director Col Joel Villanueva, dakong alas-3:00 ng hapon nang isagawa ang buy bust kung saan nakumpiska kay Parto ang nasa 18 plastic transparent sachets na naglalaman ng shabu at nakuha naman sa posesyon ni Abellera ang isang baril na glock 17 na kargado ng mga bala.
Ayon kay Reyes, hepe ng pulisya nasa listahan nila bilang HVI si Parto habang si Abellera naman ay naaktuhang bumibili ng droga habang nakasukbit sa baywang nito ang baril.
Kasalukuyang nakakulong sa costudial facility ng Lucena PNP ang dalawang suspek at sinampahan na ang mga ito ng mga kasong paglabag sa RA 9165 at RA 10591 Illegal Possession of Firearms and Ammunition. BONG RIVERA