P1-M DEATH BENEFIT NATANGGAP NA NG MGA PAMILYA NG 30 FALLEN HEALTH WORKERS

NATANGGAP na ng pamilya ng mga nasawing health worker dahil sa   COVID-19, ang isang milyong pisong  death  benefit  habang sinisikap ng  Department of Health  na makatugon sa  deadline na Hunyo 9  para maibigay  ang benepisyo sa lahat  ng nasalantang health workers.

Ayon sa DOH, naihatid na ang pera sa mga pamilya ng 30 healthcare workers kahapon, araw ng Sabado.

“We are waiting for the submission of [documents] from the heirs of the remaining two. The checks are ready already. Once submitted, the checks will be immediately delivered,” pahayag ng ahensiya.

Bukod sa 32 health workers  na nasawi sa  coronavirus disease, ang mga mayroong  “severe” COVID-19 infection  ay makatatanggap ng  ₱100,000 sickness benefit sa ilalim ng  Bayanihan to Heal As One Act.

Idinagdag ng DOH na sampu mula sa 40 health workers  ang nakatanggap ng cash assistance habang hinihintay ang iba pang dokumento mula sa claimants. Nauna rito,  iniulat ng  DOH na ang  79 healthcare workers na matinding tinamaan ng COVID-19 ay makatatanggap ng P100,000.

Matatandaang nagalit ang Pangulong Rodrigo Duterte  dahil sa nabalam na compensation ng health workers na  nahawahan ng COVID-19 kaya binigyan niya ng ultimatum ang health authorities  hanggang sa Hunyo 9 upang maibigay ang tulong.

Nagbanta pa itong sisibakin  ang  health officials na naging dahilan ng delay.

Nauna rito ay nabunyag sa pagdinig sa Senado na  wala pang healthcare worker ang nakatatanggap ng cash benefits na mandato sa ilalim ng Bayanihan to Heal As One Act, na ipinasa nitong Marso.

Paliwanag naman  ni Health Spokesperson Maria Rosario Vergeire na kailangan nilang maghanap ng pondo para rito, ngunit kalaunan ay nagpasya rin na gamitin ang  P100 million  Medical Assistance Fund  ng DOH.  CNN PHILIPPINES