P10.78-M MULTANG NALIKOM

NAKALIKOM  ang  National Food Authority (NFA) ng P10.78 milyong multa sa mga rice retailer mula ­Nobyembre 30 dahil sa iba’t ibang paglabag.

Ayon sa ulat, ang nasabing halaga ay  multa ng  may 8,826 grains businessmen dahil sa  mga paglabag katulad ng   non-renewal ng  lisensiya ng NFA, operating without license, hindi pagsunod sa itinakdang rice box at paglalagay ng  price tags.

Nadakip din ang ilang accredited  na retailer ng  NFA rice  dahil sa hindi  pagdi-display ng  NFA rice,  at iba pang paglabag.

Ito ay bunga ng pinasiglang rice and market monitoring activities ng NFA ngayong taon.

Sinabi ni NFA OIC-Administrator Tomas Escarez  na may 168,140 business establishments sa buong bansa ang na-inspeksiyon na ng NFA na nagresulta  ng pagkakahuli sa  madadayang rice traders.

Nakatulong ang pinalakas na enforcement activities ng ahensiya sa pagpapatatag ng presyo ng bigas sa mga pamilihan.

Sinabi pa ni Escarez na nang magsimulang magbenta ng bigas ang NFA  nitong buwan ng Hunyo  sa mga accredited retailer  ay tiniyak nilang maibebenta ito sa halagang P27.00 at P32.00 kada kilo.

“Ang pagpapakalat natin ng Palengke Watchers sa pakikipagtulungan ng National Bureau of Investigation (NBI) at iba pang law enforcement agencies ay malaking tulong para sa tagumpay ng NFA sa monitoring sa palengke,” dagdag ni Escarez.

Sa kabuuan may 668 malalaki at maliliit na pamilihan sa National Capital Region, kabilang ang Cavite at Rizal provinces, na may 1,946 accredited NFA rice retailers at kabuuang 5,328 licensed grains businessmen.

Malaki rin ang naitulong ng NFA Kontra Abuso Hotline na inilunsad noong  buwan ng Hulyo kung saan lahat ng 802 na reklamo na naiparating ng mga concerned citizens ang matagumpay na naresolba.       AIMEE ANOC