P14-M SHABU, IBA PANG PARTY DRUGS NASABAT NG CUSTOMS

NASABAT ng mga tauhan ng Bureau of Customs (BOC) ngayong araw sa Central Mail Exchange (CMEX) sa Pasay City ang  umaabot sa P14 milyong halaga ng shabu at P1.496-M ng party drugs na galing sa Amerika, Thailand, Pakistan at Africa.

Ayon kay Ninoy Aquino International Airport (NAIA) Customs District Collector Mimel Talusan, dumating  ang mga parsel  ng magkakaibang petsa nitong mga buwan ng Mayo at Hunyo ng  taong kasalukuyan.

May 2,017 gramo ng shabu ang nasabat  ga­ling sa Thailand, na  itinago ng nagpadala sa isang ‘foot calf massager, habang ang shabu na galing sa Africa ay inilagay sa loob ng imahe ng Virgin Mary at ang droga na galing sa America ay itinago naman sa loob ng envelope na  kasama sa sulat.

Ang  69,870 tabletas na Valium at Mogadon ay nakalagay sa isang parcel na kasama sa mga ipinadalang damit at mga laruan  na galing pa sa bansang Pakistan.

Nakita rin sa package  ang Mogadon at 48 oil ampules at 12 piraso ng canabis/marijuana  na nakasilid sa maliliit na plastic at ideklarang mga boxing gloves  at football jersey.

Batay sa rekord ng Bureau of Customs, ang shabu  ay ipadadala sa magkakaibang consignee patungong  Caloocan City, Angeles City at  Ilocos Norte  habang ang Valium at Mogadon ay para sa Cotabato City, at  ang marijuana ay para naman sa Las Piñas City.

Ang nasabing illegal drugs ay agad na inilipat sa kamay ng mga tauhan ng Philippine Drugs Enforcement Agency (PDEA) para sa masusing imbestigasyon at matukoy ang mga consignee ng mga ito.  FROILAN MORALLOS