P17-M PINSALA SA AGRI, INFRA NI ‘FABIAN’

MAHIGIT sa P17 milyon ang tinatayang halaga ng pinsala sa agrikultura at imprastraktura ng walang humpay na pag-ulan dala ng Hanging Habagat na pinalakas ng bagyong Fabian.

Ayon sa National Disaster Risk Reduction and Management Council (NDRRMC), ang tinatayang halaga ng pinsala ng Habagat sa imprastraktura ay nasa PHP2,481,000 habang sa agrikultura ay PHP14,593,900.

Nasa 345 bahay ang ‘partially damaged‘ at 109 ang ‘totally wrecked’.

Noong Sabado ay iniulat ng Department of Agriculture (DA) na tinatayang aabot sa PHP12.38 million ang halaga ng pinsala ng bagyo sa agrikultura.

Ayon sa DA, may 855 magsasaka ang apektado na may production loss na 228 metric tons at 906 ektaryang agricultural areas sa Central Luzon, Calabarzon at Western Visayas.

Ang mga apektadong commodities ay rice, corn, high value crops at livestock.

Kumikilos na ang DA Disaster Risk Reduction and Management Operations Center para matulungan ang mga apektadong magsasaka.

Iniulat din ng ahensiya na may 104,471 bags ng rice seeds, 11,390 bags ng corn seeds, at 1,949 kilograms ng assorted vegetables ang ipamamahagi pa nito.

“Loans through the Survival and Recovery Loan Program of Agricultural Credit Policy Council are also available, as well as indemnity fund from the Philippine Crop Insurance Corporation,” ayon sa DA.