P1B EDUC ASSISTANCE NG DOLE SA ANAK NG OFWs

MAKAKATANGGAP ng education assistance ang mga dependent  ng Overseas Filipino Workers (OFWs)  na  apektado ng COVID-19 pandemic.

Ayon sa Department of Labor and Employment (DOLE), handa na ang mga regional office para ipatupad ang P1 billion package ng ‘tabang’ o tertiary education assistance para sa mga anak  o dependent ng OFWs.

Kaya’t hinikayat ni Labor Secretary Silvestre Bello ang mga OFW na mayroong anak o dependent na college student na mag-apply sa programa sa pagkikipagtulungan ng Commission on Higher Education (CHED).

Ang mga regional office (RO) ng DOLE ang siyang magpoproseso at sasala ng mga aplikasyon para sa programa upang maayos itong maipatupad kabilang ang paglalabas ng tulong pinansiyal sa mga benepisyaryo.

Nabatid na pagkakalooban ang mga kuwalipikadong benepisyaryo ng P30,000 tulong pinansiyal.

“Ang tulong ay first-come, first-serve basis kaya hinihikayat ang mga OFW na mag-aplay sa mga regional office ngayon pa lamang. Sila ang nakatalaga upang umasikaso ng pagbabayad, kabilang ang paglalabas ng tulong pinansiyal para sa mga benepisyaryo,” ani Bello.

Saklaw ng tulong pinansiyal ang gastusin para sa pampaaral tulad ng mga textbook o learning material, academic at extra-curricular expense, at stipend tulad ng board and lodging, clothing, transportation, health o medical needs, at mga school supplies.

Nagbibigay ang Tabang OFW ng tulong sa mga kasalukuyang naka-enroll na anak ng mga OFW na apektado ng pandemya, kinakailangang makapagbigay ang mga ito ng admission at retention requirement sa mga kolehiyo at unibersidad ng gobyerno o pribadong institusyon.

Dagdag pa rito, ang mga kuwalipikadong benepisyaryo ay hindi dapat na-expel sa kanilang mga paaralan, walang anumang scholarship grant mula sa ahensiya ng gobyerno at sertipikado ng DOLE bilang dependent ng OFW na repatriated, o nawalan ng trabaho dahil sa COVID-19 pandemic, o namatay dahil sa COVID-19.

Ang mga benepisyaryo ay dapat na financially dependent sa mga OFW para sa kanilang pag-aaral sa kolehiyo upang maging kuwalipikado sa programa batay sa joint memorandum circular na nilagdaan ni Bello at CHEd chair Prospero de Vera III noong nakaraang linggo.

Sa ilalim ng circular, ang DOLE ang kikilala sa mga OFW na mayroong mga dependent o nais mag-enroll sa pampubliko o pribadong higher education institution para sa academic year 2020-2021.

Ang na-repatriate o na-displace na OFW ay dapat na magtalaga ng isa sa kanyang dependent na magiging kabilang sa programa. Kung sumakabilang buhay na ang OFW, ang legal surviving spouse, parent, o next of kin ang siyang magtatalaga ng dependent.

Ang pondo para sa programa ay ililipat sa DOLE mula sa United Student Financial Assistance System for Tertiary Education ng CHED.  LIZA SORIANO