SULU- KAHON-kahong inabandonang “smuggled” na sigarilyo na aabot sa halagang P210,000 ang nakumpiska ng Philippine Coast Guard (PCG) sa isang pampasaherong barko mula sa Port of Siasi sa lalawigang ito.
Ayon sa PCG, ang naturang kargamento ay nakumpiska habang iniinspeksyon ang mga inabandonang bagahe na sakay ng MV Ever Queen of the Pacific na bumibiyahe mula Port of Siasi papuntang Port of Zamboanga.
Natuklasan sa 10 kahon at ilang mga bag nang buksan ng mga tauhan ng PCG ang mga ito na naglalaman ng 300 ream ng sigarilyo na hinihinalang iligal na inangkat sa bansa.
Agad itong kinumpiska ng PCG para ma-i-turnover sa Bureau of Customs (BOC) at maiproseso.
Isasailalim sa imbestigasyon ang mga nakumpiskang sigarilyo para malaman ang mga suspek o mga smugglers sa likod ng naturang mga kontrabando. PAUL ROLDAN