ARESTADO ang dalawang bagong identified drug personalities, kabilang ang isang bebot sa isinagawang buy bust operation at makumpiskahan ng aabot sa P61-K halaga ng shabu sa Malabon City kahapon ng madaling araw.
Kinilala ni Malabon police chief Col. Albert Barot ang naarestong mga suspek na sina Jamica Pamandanan alyas “Mica”, 24-anyos at Vicente Mendiola II alyas “Toy”, 33-anyos, kapwa ng Brgy. Potrero.
Ayon kay MSg Randy Billedo, dakong alas-3 ng madaling araw nang magsagawa ang mga operatiba ng Station Drug Enforcement Unit (SDEU) sa ilalim ng pangangasiwa ni Lt Alexander Dela Cruz ng buy bust operation sa University Ave., Brgy. Potrero.
Kaagad sinunggaban ng mga operatiba ang mga suspek matapos bentahan ng P500 halaga ng shabu si Cpl Erniel Jay Cantos na umakto bilang poseur buyer.
Nakumpiska sa mga suspek ang tinatayang nasa 9 gramo ng shabu na may standard drug price P61,200 at marked money.
Nahaharap ang naarestong mga suspek sa kasong paglabag sa RA 9165 o Comprehensive Dangerous Drug Act. VICK TANES