P750 NA MINIMUM WAGE, PINASESERTIPIKAHANG URGENT BILL KAY DUTERTE

Rep Antonio Tino

HINIMOK ng progresibong grupo si Pangulong Rodrigo Duterte na sertipikahang  urgent  bill ang hinihinging P750 minimum wage ng mga manggagawa sa buong bansa.

Ito ay sa gitna ng   patuloy na pagtaas ng pres­yo ng mga bilihin   na isinisisi sa Tax Reform for Acceleration and Inclusion (TRAIN) Act at pagtaas ng presyo ng produktong petrolyo.

Hamon ni ACT Teacher’s partylist Representative Antonio Tino sa administrasyong Duterte  na gawing priority ito sa pagbubukas ng susunod na Kongreso.

Nag-file na ng House Bill 7787 ang  Makaba­yan Bloc para sa P750 national minimum wage sa lahat ng negosyo o industrya kahit saan mang lugar sa bansa, gaano man ito kalaki.

Nakatakdang bumalik sa sesyon ang Kongreso sa Hulyo 24  kung saan magtitipon ang  mga mambabatas sa Batasan Pambansa para sa  State of the Nation Address (SONA) ni Duterte.

“Sa lahat ng mang­gagawa sa buong bansa, panahon na po para magkaisa tayo na mapalakas at ipanawagan sa gob­yernong ito na isabatas na kaagad ‘yung House Bill 7787 na national minimum wage sa buong bansa na nagkakahalaga ng P750 sa private sector,” pahayag naman ni Kilusang Mayo Uno Secretary-General Jerome Adonis sa ginanap na forum.

“Nananawagan kami kay Pangulong Duterte na gawin niya itong urgent bill dahil kailangang-kailangan na ng mga manggagawa,” dagdag ni Adonis.

Sinabi naman ni Par­tido Manggagawa Spokes­person Wilson Fortaleza na hindi na makapaghihintay ang mga manggagawa  para sa dagdag sa sahod.  Hindi na umano dapat ipagpaliban ang umento  dahil hayag naman ang dahilan kung bakit hinihingi ito.

Nangangamba naman ang Employers Confederation of the Philippines (ECOP) na posibleng  magdulot ng mass layoff  sakaling aprubahan ang panukalang P750 national minimum wage.

Ayon kay ECOP Director General Jose Roland Moya, maging ang kompanya ay pinapasan at nahihirapan din sa epekto ng TRAIN dahil sa pagtaas ng presyo ng raw materials.

Iginiit ni Moya, sakaling ipag-utos ng pamahalaan ang nasabing umento sa sahod, posibleng magdusa at malugi ang mga negosyo na magdudulot naman ng pagsasara o pagtatanggal ng mga manggagawa.

Gayunman binigyang diin ni Moya na ang kanyang pahayag ay hindi banta kundi isang katotohanan na malaki ang posibilidad na mangyari. NENET VILLAFANIA

3 thoughts on “P750 NA MINIMUM WAGE, PINASESERTIPIKAHANG URGENT BILL KAY DUTERTE”

Comments are closed.