CEBU– APAT katao ang nasawi habang anim na iba pa ang sugatan nang sumabog at masunog ang pagawaan ng paputok kahapon sa Barangay Babag 2, Lapu-Lapu City sa lalawigang ito.
Batay sa ulat ng Lapu-Lapu City Police Station 3, nagsimula ang sunog dakong alas-1:40 ng hapon sa Purok Judas belt sa nasabing barangay.
Nauna rito, nakarinig ng pagsabog ang mga residente sa lugar kasunod ng mabilis na pagsiklab ng apoy.
Sampung bahay na ginagamit na imbakan ng paputok ang nadamay sa sunog.
Nasawi ang mga biktima matapos na makulong sa loob ng imbakan.
Isinulat ang balitang ito, patuloy pa ang ginagawang imbestigasyon ng mga tauhan ng Bureau of Fire Protection (BFP) upang malaman ang dahilan ng sunog at kung magkanong halaga ng ari-arian ang tinupok ng apoy. EUNICE CELARIO
