PADALA NG OFWs BUMUHOS NOONG HULYO

TUMAAS ang remittances ng overseas Filipino workers mula sa iba’t ibang bansa noong Hulyo.

Ayon sa Bangko Sentral ng Pilipinas (BSP), pumalo ang personal remittances ng OFWs sa $2.9 billion noong Hulyo 2019, mas mataas ng 7.2 per-cent sa $2.7 billion na naitala sa kahalintulad na buwan noong nakaraang taon.

Kapag pinagsama-sama, ang personal remittances sa unang pitong buwan ng taon ay lumobo ng 3.6 percent sa $19.1 billion mula sa $18.5 billion noong 2018.

“The steady growth in personal remittances during the first seven months of 2019 drew support from the remittance inflows from land-based over-seas Filipino workers with work contracts of one year or more, which aggregated to $14.6 billion from $14.2 billion in the same period last year,” wika ni  BSP Governor Benjamin Diokno.

Nakapag-ambag sa paglagong ito ang perang padala ng sea-based at land- based workers na may short-term contracts na umabot sa $4.1 billion mula sa $3.8 billion noong nakaraang taon.

Tumaas din ang cash remittances na ipinadala sa pamamagitan ng mga bangko sa $2.6 billion noong Hulyo 2019 mula sa $2.4 billion na naitala sa kaparehong panahon noong nakaraang taon.

“This brought cash remittances for the Jan-July 2019 period to $17.2 billion, 3.9 percent higher than the $16.6 billion recorded in the same period last year,” ayon sa BSP.

Ang cash remittances mula sa land-based at sea-based workers ay tumaas ng 2.5 percent sa $13.4 billion at 8.9 percent sa $3.8 billion, ayon sa pagkakasunod.

Ang US ang may pinakamataas na share sa overall remittances sa ­unang pitong buwan ng taon sa 36.8 percent, sumusunod ang  Saudi Arabia, Singa-pore, United Arab Emirates, UK, Japan, Canada, Hong Kong, Germany at Kuwait. Ang  combined remittances mula sa nasabing mga bansa ay bumu-buo sa 78.1 percent ng total cash remittances mula Enero hanggang ­Hulyo 2019.