PADALANG PERA NG OFWs TUMAAS ($2.382-B noong Mayo)

LUMAKI ang cash remittances mula sa overseas Filipinos noong Mayo, ayon sa Bangko Sentral ng Pilipinas (BSP).

Sa datos ng BSP, ang cash remittances mula sa OFs ay tumaas ng13 percent sa $2.382 billion noong Mayo mula sa $2.106 billion sa kaparehong panahon noong nakaraang taon.

Mula Enero hanggang Mayo, ang cash remittances ay may kabuuang $12.28 billion, tumaas ng 6.3 percent mula sa $11.554 billion noong nakaraang taon.

Karamihan sa padalang pera ay nagmula sa US, Malaysia, South Korea, Singapore at Canada.

Ang US ang nagtala ng pinakamalaking share sa overall remittances sa 40.1 percent, kasunod ang Singapore, Saudi Arabia, Japan, UK, United Arab Emirates, Canada, South Korea, Qatar at Taiwan.

Tumaas din ang personal remittances sa 13.3 percent sa $2.652 billion noong Mayo mula sa $2.341 billion sa kahalintulad na panahon noong nakaraang taon.

Ayon sa central bank, ang pinagsama-samang personal remittances mula Enero hanggang Mayo ay tumaas ng 6.6 percent sa $13.7 billion mula $12.835 billion noong nakaraang taon.